Elordalyq oqýshylar men jeńildik sanatyndaǵy azamattarǵa LRT kartasy beriledi
ASTANA. KAZINFORM – 28 sáýirden bastap Astana qalasy oqýshylary men jeńildik sanattaryna arnalǵan LRT ataýly kólik kartasyn rásimdeýge onlaın ótinim berý qyzmeti iske qosylady.
LRT ataýly kólik kartasyn elordanyń bilim berý uıymdarynyń 7 jastan 18 jasqa deıingi oqýshylary, sondaı-aq qoldanystaǵy zańnamaǵa sáıkes jeńildik sanattaryna jatatyn, Astana qalasynda tirkelgen jáne turaqty turatyn azamattary ala alady.
Kartanyń daıyn bolǵany týraly paıdalanýshy ótinim berý kezinde kórsetken telefon nómirine SMS-habarlama keledi.
Kartany daıyndaý quny — 1200 teńge.
— Ótinim berý tek onlaın formatta https://transcard.kz resmı saıty arqyly júzege asyrylady. Rásimdeý úshin málimetterdi toltyryp, qajetti qujattardy tsıfrlyq formatta tirkeý jáne kartany alý úshin yńǵaıly pýnktti (jaqyn aýdandyq ákimdik) tańdaý qajet.
Qyzmettiń qoljetimdiligin arttyrý maqsatynda qalanyń 6 aýdandyq ákimdiginde daıyn kartalardy berý oryndary uıymdastyryldy. Daıyn bolǵan kartalar sonda jiberiledi. Kartany paıdalanýshy ótinim berý kezinde tańdalǵan tıisti aýdandyq ákimdikten alady, — delingen CTS habarlamasynda.
LRT ataýly kólik kartasy tek LRT-men júrýge arnalǵan jáne qalalyq baǵdarlarǵa jaramsyz.
Basqa jolaýshylar úshin jol júrýge arnalǵan kólik kartalary men bir rettik bıletter LRT iske qosylǵannan keıin stansalarda qoljetimdi bolady. Sondaı-aq, kassaǵa júginbeı týrnıketterden ótýge múmkindik beretin balamaly tólem tásilderi qarastyrylǵan. Tólem tásilderi týraly qosymsha habarlanady.
Aıta ketelik LRT bir kúnde qansha jolaýshy tasymaldaı alatyny týraly jazǵan edik.
