Elordalyq oqýshylar AQSh-taǵy álemdik STEM jarysynda úzdik nátıje kórsetti
ASTANA. KAZINFORM – Astana oqýshylary AQSh-tyń Hıýston qalasynda ótken álemdegi eń iri STEM jarystarynyń biri – FIRST World Championship dodasynda el namysyn qorǵap, joǵary nátıje kórsetti.
Respýblıkalyq fızıka-matematıka mektebiniń FoxSlide jáne Fizmat Robotics komandalary halyqaralyq arenada pleı-off kezeńine ótip, bedeldi marapatty ıelendi, dep habarlaıdy elorda ákimdiginiń resmı saıty.
AQSh-tyń Hıýston qalasynda FIRST World Championship álem chempıonaty 29 sáýir men 2 mamyr aralyǵynda ótti. Jarys STEM salasyndaǵy eń iri sharalardyń biri bolyp sanalady. Baıqaýǵa 66 elden qatysýshylar jınaldy.
Qazaqstan atynan FTC sanatynda eń myqty 12 mektep komandasy óner kórsetti.
Olardyń qatarynda Astana qalasyndaǵy Respýblıkalyq fızıka-matematıka mektebiniń FoxSlide jáne Fizmat Robotics komandalary erekshe kózge tústi. Komandanyń halyqaralyq chempıonatqa qatysýyna RFMM basshylyǵy qoldaý bildirip, Fizmat Endowment Fund qory demeýshilik etti.
Aıta keterligi, oqýshylardyń jarysqa qatysýy ata-analarǵa eshqandaı qarjylyq salmaq túsirmeı uıymdastyryldy.
Mektep demeýshilerdi tartyp, qajetti qoldaýdy qamtamasyz etse, qor seriktesterge usynystardy daıyndaý men rásimdeý jumystaryna jan-jaqty qoldaý kórsetti.
FoxSlide komandasy senimdi óner kórsetip, pleı-off kezeńine sátti ótip, halyqaralyq arenada joǵary daıyndyq deńgeıin jáne básekege qabilettiligin dáleldedi.
Al Fizmat Robotics komandasy aıryqsha jetistikke qol jetkizip, Franklin dıvızıonynda bedeldi Reach Award júldesin (1-oryn) ıelendi. Bul marapat tek tehnıkalyq jetistikter úshin ǵana emes, sonymen qatar STEM qaýymdastyǵyn damytýǵa jáne ınjenerlik mamandyqtardy nasıhattaýǵa qosqan eleýli úlesi úshin beriledi.
Komanda 4 mıllıonnan astam aýdıtorııany qamtyp, ınteraktıvti QR-kodtar men mýltımedııalyq sheshimder sııaqty zamanaýı ári kreatıvti formattardy qoldandy.
Oqýshylar bilim berý uıymdarymen belsendi jumys júrgizip, mektepter men balabaqshalarda kezdesýler, prezentatsııalar jáne praktıkalyq sabaqtar ótkizdi.
Sonymen qatar, Fizmat Robotics halyqaralyq deńgeıde resýrstar tartýǵa múmkindik bergen jeke tsıfrlyq fandraızıng platformasyn ázirledi. Bul jetistik RFMM-nyń myqty akademııalyq ortasynyń jáne Qazaqstanda ınjenerlik bilim berýdi júıeli damytý jumysynyń zańdy nátıjesi bolyp tabylady.
Qazylar alqasy Fizmat Robotics komandasynyń strategııalyq kózqarasy men kóshbasshylyq qabiletterin joǵary baǵalap, olardyń jergilikti bastamalardy turaqty jahandyq ekojúıege aınaldyrýdaǵy jetistigin erekshe atap ótti.
Elordalyq eki komandanyń jarqyn jetistigi, Respýblıkalyq fızıka-matematıka mektebi ujymynyń atqarǵan eńbeginiń nátıjesi. Atalǵan bilim ordasy olımpıadalyq jarystarda únemi aldyńǵy qatardan kórinip keledi.
Aıta keteıik, buǵan deıin Qazaqstannyń ulttyq quramasy Balqan matematıka olımpıadasyna qatysatyny málim boldy.
