Elordalyq oqýshylar 1825 keli qoqys jınap, baıqaýda jeńdi
ASTANA. KAZINFORM — Astanadaǵy Farıza Ońǵarsynova atyndaǵy № 77 mektep-gımnazııasynyń oqýshylary ekologııalyq mádenıetti qalyptastyrýda naqty nátıjege qol jetkizip otyr.
Oqýshylar qoqysty suryptap, ony qaıta óńdeýge jiberýdi ádetke aınaldyrǵan. Bul jumys «Taza Qazaqstan» tujyrymdamasy sheńberinde ótken baıqaýda joǵary baǵalanyp, mektep ujymy úzdik nátıje kórsetti.
Gımnazııa dırektory Nurlan Ysqaqovtyń aıtýynsha, birneshe aı ishinde istelgen jumys kólemi aıtarlyqtaı. Osy ýaqyt aralyǵynda 1825 keli qoqys suryptalyp, qaıta óńdeýge jiberilgen.
— Baıqaýda 119 mektep ujymynyń arasynan sýyrylyp shyqtyq. Suryptalǵan qoqysty qabyldaýshylarǵa jónelttik, — dedi Nurlan Ysqaqov.
Eko-jetekshi Orazmuhamedjankereı Jańabaıulynyń sózinshe, bastama oqýshylardyń kózqarasyn aıtarlyqtaı ózgertken.
— Balalar kishkentaı bastamanyń aıasynda qorshaǵan ortaǵa qurmetpen qaraýdy úırendi, — dedi ol.
Qaldyqtardy suryptaý jumysy arnaıy ekoqoldaý qosymshasy arqyly júzege asyrylady. Joba oqýshylardy jastaıynan qaldyqtardy durys suryptaýǵa úıretip qana qoımaı, ekologııalyq mádenıetti qalyptastyrýǵa baǵyttalǵan. Sonymen qatar qatysýshylar úshin qosymsha tabys tabý múmkindigi de qarastyrylǵan.
Turaqty tazalyqqa negizdelgen bastama aldaǵy ýaqytta keńeıe túspek. Joba eldiń 15 óńirinde jalǵasyn taýyp, mektep oqýshylaryn keńinen qamtý kózdelip otyr.
Aıta keteıik, 19-29 naýryz aralyǵynda qazaqstandyq oqýshylar 11 kún boıy kóktemgi demalysta bolady.
