Elordalyq oqýshy sırek kezdesetin gúlderdi ósiredi
ASTANA. KAZINFORM — Astana qalasyndaǵy № 81 «Astana English School» halyqaralyq mektebiniń 9-synyp oqýshysy Amangeldi Ersultan jazǵy demalysyn erekshe gúlder men sırek ósimdikterdi kútip-baptaýǵa arnap júr, dep habarlaıdy elorda ákimdiginiń resmı saıty.
Jas zertteýshi búginde mektep jylyjaıynda ósiriletin gúlderdiń ósýin baqylap, olardy kóbeıtý jáne saqtaý jumystarymen aınalysady.
Mektepte ekologııalyq mádenıetti qalyptastyrý jáne oqýshylardyń ǵylymı qyzyǵýshylyǵyn arttyrý maqsatynda arnaıy ósimdikter ósiretin kabınet ashylǵan. IAES STEM Greenhouse dep atalatyn bul ortalyqta oqýshylar gúlder men ósimdikterdiń ondaǵan túrin ósirip, olardyń bıologııalyq erekshelikterin zertteıdi. Kabınet zamanaýı jabdyqtarmen qamtamasyz etilip, ósimdikterge qajetti jaryq, temperatýra jáne sýarý júıeleri qarastyrylǵan.
Osy jobanyń belsendi múshesi Amangeldi Ersultan sırek kezdesetin sándik gúlderdi ósirýge erekshe qyzyǵýshylyq tanytady. Ol ár ósimdiktiń kútim erekshelikterin zerttep, olardyń ósý qarqynyn baqylap otyrady. Jazǵy demalys kezinde de oqýshy mektep jylyjaıyna kelip, gúlderdiń jaı-kúıin tekserip, kútim jasaý jumystaryn jalǵastyrǵan.
— Ósimdikterdi ósirý — úlken jaýapkershilik. Ár gúldiń ózine tán kútimi bar. Keıbirine kóbirek jaryq qajet bolsa, endi biri belgili bir temperatýrada ǵana jaqsy ósedi. Osyndaı tájirıbeler arqyly biz tabıǵatty tereńirek túsinemiz, — deıdi Ersultan.
Jas zertteýshiniń ǵylymǵa degen qyzyǵýshylyǵy kezdeısoq emes. Ol — qazaqtyń belgili ǵalymy, bıologııa ǵylymdarynyń kórnekti ókili Kárim Myńbaevtyń urpaǵy. Ǵalym atasynyń jolyn úlgi tutqan oqýshy búginde ǵylymı-zertteý jumysyna belsendi aralasyp, jaratylystaný baǵytynda izdenip keledi.
Ótken jyly Ersultan Botanıkalyq baqtyń oranjereıalarynda bolyp, tropıkalyq ósimdikter men sýkkýlentterdiń sırek túrlerimen tanysty. Sonymen qatar halyqaralyq ekologııalyq semınarlarǵa qatysyp, sheteldik mamandarmen tájirıbe almasty.
Mektep qabyrǵasynda ashylǵan arnaıy jylyjaı kabıneti oqýshylarǵa teorııalyq bilimdi tájirıbemen ushtastyrýǵa múmkindik berip otyr.
Buǵan deıin 240-tan astam oqýshy «InnovArt» festıvalinde óz jumystaryn usynǵanyn jazdyq.
