Elordalyq oqýshy oqý úderisin jetildiretin joba oılap tapty
ASTANA. KAZINFORM – Astana qalasyndaǵy Sheıh Halıfa ben Zaıd ál-Nahaıan atyndaǵy №84 mektep-lıtseıiniń 9 «A» synyp oqýshysy Aldııar Bekjan «Tsıfrly mektep» jobasyn iske asyrdy. Bul joba bilim berý protsesin qazirgi zaman talaptaryna saı jetildirýge jáne bilim sapasyn arttyrýǵa baǵyttalǵan, dep habarlaıdy elorda ákimdiginiń resmı saıty.
«Tsıfrly mektep» – aqparattyq tehnologııalar men bilim mazmunyn ıntegratsııalaǵan keshendi júıe. Joba aıasynda dástúrli oqytý ádisteri tsıfrlyq platformalarmen tolyqtyrylyp, ınteraktıvti kontent keńinen qoldanylady. Nátıjesinde qaǵazbastylyq azaıyp, oqý protsesin naqty ýaqyt rejıminde baqylaý múmkindigi paıda bolady.
Mektep basshysy Samal Botahanqyzynyń aıtýynsha, oqýshynyń bastamasy mektepte ınnovatsııalyq oılaý men tehnologııalyq sheshimderdiń tıimdi úlgisin kórsetedi.
Júıeniń negizgi erekshelikteriniń biri – ınteraktıvti oqýlyqtar men oqytýdy basqarý platformasynyń (LMS) engizilýi.
Oqýshylar 3D modelder, beınedárister jáne anımatsııalyq tapsyrmalar arqyly bilimderin tereńdetse, muǵalimder oqý protsesin tıimdi uıymdastyryp, tapsyrmalardy onlaın qabyldap, jedel baǵalaı alady. Sonymen qatar robototehnıka, jasandy ıntellekt jáne vırtýaldy zerthanalar kúrdeli pánderdi tájirıbelik turǵyda meńgerýge múmkindik beredi.
Joba aıasynda Big Data analıtıkasy mańyzdy ról atqarady. Bul tehnologııa ár oqýshynyń úlgerimin taldap, jeke qabileti men bilim deńgeıine sáıkes oqý traektorııasyn qalyptastyrýǵa múmkindik beredi. Mundaı tásil oqýshylardyń dara damýyna jaǵdaı jasap, olardyń tsıfrlyq saýattylyǵyn arttyrady.
Budan buryn qazaqstandyq oqýshylar XV Eýropalyq qyzdar matematıkalyq olımpıadasyna qatysatynyn habarlaǵanbyz.
