Elordalyq oqýshy álemniń top ýnıversıtetterinen shaqyrtý aldy
ASTANA. KAZINFORM — Astanada № 9 «Zerde» mamandandyrylǵan lıtseıiniń 11-synyp oqýshysy Ermuhamed Túktibaı halyqaralyq deńgeıdegi úlken jetistikterimen kózge túsip, álemniń jetekshi ýnıversıtetterine shaqyryldy, dep habarlaıdy elorda ákimdiginiń resmı saıty.
Jas talapker birden birneshe bedeldi joǵary oqý ornynyń bilim grantyna ıe boldy.
Ermuhamed QS álemdik reıtınginde aldyńǵy oryndarda turǵan The University of Hong Kong (HKU) ýnıversıtetine «Mashına jasaý» mamandyǵy boıynsha oqýǵa shaqyryldy. Sonymen qatar, The Hong Kong Polytechnic University jáne City University of Hong Kong ýnıversıtetteri oǵan oqý aqysy men turý shyǵyndaryn tolyq óteıtin granttar usyndy. Mundaı usynystar halyqaralyq tájirıbede óte sırek kezdesedi jáne talapkerdiń akademııalyq deńgeıiniń erekshe joǵary ekenin kórsetedi.
Bolashaq ınjenerdiń bilim kórsetkishteri de tańǵalarlyq. Ermuhamed halyqaralyq emtıhandarda úzdik nátıje kórsetken: SAT — 1540 ball, onyń ishinde 790 ball matematıkadan, al IELTS — 8.0, bul aǵylshyn tilin erkin akademııalyq deńgeıde meńgergenin dáleldeıdi.
Sarapshylardyń aıtýynsha, mundaı upaılar álemniń eń myqty ýnıversıtetterine erkin túsýge múmkindik beredi.
Ermuhamed tek joǵary test nátıjelerimen shektelmeıdi. Ol — tájirıbege beıim jas zertteýshi. Onyń ınjenerlik jobalary materıaldardyń tózimdiligin zertteýge baǵyttalǵan: oqýshy SolidWorks baǵdarlamasynda tisti berilisterdi ózi jobalap, olardy 3D-baspa arqyly jasap, túrli polımerlerdiń tozý deńgeıine tájirıbelik synaqtar júrgizgen.
Sonymen qatar, jas ǵalym matematıka men ónerdiń toǵysyn da zerttegen. Ǵylymı jobasy aıasynda ol sýretshi M. K. Esherdiń paradokstaryn vızýaldy-matematıkalyq turǵydan taldap, «múmkin emes» fıgýra retinde tanymal Penroýz úshburyshynyń fızıkalyq modelin qurastyrdy. Bul joba onyń kreatıvti oılaý qabileti men kúrdeli ǵylymı uǵymdardy praktıkamen ushtastyra alatynyn kórsetti.
Mamandardyń pikirinshe, Ermuhamedtiń jetistigi — tek jeke tabys emes, sonymen birge qazaqstandyq oqýshylardyń jahandyq bilim keńistiginde básekege qabiletti ekenin dáleldeıtin mańyzdy kórsetkish. Jas talapkerdiń aldaǵy ýaqytta ınjenerııa salasynda iri jańalyqtarǵa jol ashýy ábden múmkin.
Aıta keteıik, osyǵan deıin osy mekteptegi 11-synyp oqýshysy Aıala Serikqyzy álemniń TOP-10 ýnıversıtetterinen resmı shaqyrtý alǵan. Olardyń qatarynda Lıga Plıýşa (IVY League) qataryna kiretin Harvard University, Brown University, University of Cambridge, Stanford University, MIT jáne álemdik reıtıngterge engen ózge de bedeldi ýnıversıtetter bar.