Elordalyq oqýshy álemniń 10 jetekshi ýnıversıtetinen shaqyrtý aldy
ASTANA. KAZINFORM — Astana qalasyndaǵy № 9 «Zerde» mamandandyrylǵan lıtseıiniń 11-synyp oqýshysy Aıala Mahanbetáli álemniń jetekshi on ýnıversıtetinen birden resmı shaqyrtý aldy, dep habarlaıdy elorda ákimdiginiń resmı saıty.
Erekshe jetistik — bul shaqyrtýlar talapkerdiń jeke ótinishi negizinde emes, joǵary oqý oryndarynyń óz bastamasymen joldanǵan.
Shaqyrtý joldaǵan ýnıversıtetterdiń qatarynda Ivy League quramyna kiretin Harvard University men Brown University, sondaı-aq University of Cambridge, Stanford University, Massachusetts Institute of Technology (MIT) jáne álemdik bedeldi reıtıngterde kósh bastap turǵan ózge de aldyńǵy qatarly joǵary oqý oryndary bar.
— Basty ereksheligi — ýnıversıtetterdiń oqýshynyń akademııalyq jáne zertteýshilik áleýetin aldyn ala jan-jaqty saralap, sonyń negizinde oqýǵa shaqyrǵan. Mundaı tájirıbe álemdik joǵary bilim berý keńistiginde sırek kezdesedi jáne talapkerge kórsetilgen joǵary senimniń aıqyn dáleli sanalady. Oqýshyǵa usynylǵan qarjylyq qoldaýdyń jalpy kólemi 2 mıllıon AQSh dollaryn quraıdy. Atalǵan qarajat oqý shyǵyndaryn tolyq nemese ishinara óteýge múmkindik beredi, — delingen habarlamada.
Aıalanyń akademııalyq joly 8-synyptan bastaý alady. Osy ýaqyt aralyǵynda ol halyqaralyq bilim berý baǵdarlamalaryna, akademııalyq jáne ǵylymı-zertteý jobalaryna turaqty túrde qatysyp keledi. Ýnıversıtetterden resmı shaqyrtý alǵanǵa deıin ol ártúrli elderden kelgen qatysýshylarmen birlesip halyqaralyq jobany iske asyryp, ony praktıkalyq deńgeıde júzege asyra bildi. Joba ınvestıtsııa tartyp, naqty nátıjege qol jetkizgen.
Qazirgi tańda Aıala Kanadada ornalasqan kompanııada osy joba aıasynda jumys istep, mekteptegi oqýyn kásibı qyzmetpen qatar alyp júr. Sonymen qatar, ol 11-synyp oqýshysy bola tura, ýnıversıtettik kýrstardan ótip, bolashaqta esepteletin akademııalyq kredıtterdi aldyn ala meńgerip jatyr.
Bul jetistik álemniń jetekshi ýnıversıtetteriniń zamanaýı ustanymyn aıqyn ańǵartady. Búginde olar tek úzdik talapkerlerdi irikteýmen shektelmeı, akademııalyq áleýeti joǵary mekteptermen tikeleı seriktestik ornatýǵa erekshe mán berip otyr.
Aıta ketsek, 2026 jyldyń 1 qańtarynan elimizde jańa Salyq kodeksi kúshine enedi. Osyǵan oraı joǵary oqý oryndarda aqyly bilim alý quny arta ma? Senatta BAQ ókilderiniń osy saýalyna Ǵylym jáne joǵary bilim vıtse-mınıstri Gúlzat Kóbenova jaýap berdi.