Elordalyq meıramhanada qonaqtardy shapan kıgen robot qarsy aldy
ASTANA. KAZINFORM — Astanada «Naýryznamanyń» onkúndigi aıasynda ótken Ulttyq kıim kúnine oraı qaladaǵy meıramhanalardyń birinde qonaqtarǵa daıashy robot qyzmet kórsetti, dep habarlaıdy elorda ákimdiginiń resmı saıty.
Bul bastama Esil aýdany ákimdigi men meıramhananyń birlesken jobasy retinde júzege asyryldy.
Meıramhana dırektory Quralaı Saýytbaeva bul ıdeıanyń qalaı júzege asqanyn aıtyp berdi. Onyń sózinshe, «Arystan» atty robot-daıashy 2019 jyldan beri jumys isteıdi jáne osy ýaqyt ishinde kelýshilerdiń qyzyǵýshylyǵyn týdyratyn erekshe elementke aınalǵan.
– Bizde «Arystan» atty robot-daıashy bar. Ol meıramhana ashylǵan sátten, ıaǵnı 2019 jyldan beri jumys isteıdi. Osy ýaqyt aralyǵynda ol jaı ǵana tehnıka emes, balalarǵa da, eresekterge de qyzyq bolatyn erekshe nysanǵa aınaldy, – dedi meıramhana dırektory.
Quralaı Saýytbaevanyń aıtýynsha, Naýryz meıramy qarsańynda ujym dástúrli bezendirýmen ǵana shektelmeı, qonaqtarǵa erekshe atmosfera syılaýdy kózdegen.
– Naýryz qarsańynda bizge bir oı keldi: nege osy robotty ulttyq stılde qoldanbasqa? Biz ony qazaqtyń ulttyq kıimimen kıindirip, qonaqtarǵa erekshe kóńil kúı syılaǵymyz keldi. Ideıa qarapaıym bolǵanymen, áseri aıryqsha boldy. Osy arqyly dástúrge degen qurmetimizdi bildirip, merekelik kóńil kúı qalyptastyrǵymyz keldi, – dedi ol.
Aıta ketý kerek, boıy 1 metr 32 santımetr bolatyn «Arystan» bir mezgilde birneshe tapsyrysty jetkize alady. Ol daıashylarmen birge qozǵalyp, sharshamaı jumys isteıdi jáne qatelik jibermeıdi. Degenmen, robot adam eńbegin almastyrmaıdy, kerisinshe qyzmet kórsetý úderisin jeńildetip, daıashylarǵa qonaqtarmen kóbirek qarym-qatynas jasaýǵa múmkindik beredi.
Osylaısha, elordada ótken Ulttyq kıim kúni dástúr men zamanaýı tehnologııalardyń úılesimdi ushtasýynyń erekshe úlgisine aınaldy.
Budan buryn TJM ınnovatsııalyq órt sóndirýshi robotty tanystyrǵanyn jazǵan edik.