Elordalyq mekteptiń oqý baǵdarlamasyna jasandy ıntellekt engizildi

ASTANA. KAZINFORM — 2023 jyldan bastap № 84 mektep-lıtseıiniń oqý protsesine jasandy ıntellekt (JI) tehnologııalaryn engizý baǵytynda júıeli jumys júrgizilip keledi, dep habarlaıdy elorda ákimdiginiń resmı saıty.

Qazirgi tańda bilim berý salasynda zamanaýı tehnologııalardy tıimdi paıdalaný — ýaqyt talaby. Osy baǵytta elordanyń № 84 mektep-lıtseıi kóshbasshylar qatarynan kórinip otyr.

Jańa bastamanyń negizgi maqsaty — bilim sapasyn arttyrý, oqý-tárbıe úderisin tıimdi uıymdastyrý jáne muǵalimder men oqýshylar úshin qolaıly ári qaýipsiz orta qalyptastyrý.

Mektep ınnovatsııany engizýde Google Workspace for Education platformasyn tańdady. Bul orta muǵalimder men oqýshylarǵa birlesken jumysty tıimdi uıymdastyrýǵa jol ashady. Google Classroom, Google Docs, Google Sheets, Google Slides, Google Forms sekildi quraldar sabaq josparyn ázirleýdi, tapsyrmalardy oryndaýdy jáne jedel keri baılanys ornatýdy jeńildetedi.

Sonymen qatar oqý protsesine Gemini AI platformasy engizildi. Jasandy ıntellekt muǵalimder úshin birqatar tıimdilik usynady: oqý materıaldaryn ár oqýshynyń jeke qajettiligine beıimdeý, avtomatty túrde suraqtar men test tapsyrmalaryn qurastyrý, oqýshylardyń jumysyn ádil ári jyldam baǵalaý, sabaqqa daıyndyq ýaqytyn qysqartyp, tıimdilikti arttyrý.

— Jasandy ıntellekt tehnologııalaryn oqý protsesine engizý — bizdiń mektep úshin úlken jetistik. Bul qadam muǵalimderdiń jumysyn jeńildetip qana qoımaı, oqýshylardyń bilim alýyna jańa serpin beredi. Eń bastysy — ár balanyń jeke qabileti men qyzyǵýshylyǵyna saı bilim alýǵa jaǵdaı jasalady. Biz oqýshylarymyzdy bolashaqtyń talaptaryna saı, jan-jaqty damyǵan tulǵa etip tárbıeleýdi kózdep otyrmyz, — deıdi № 84 mektep-lıtseıiniń dırektory Samal Nuǵymanova.

Osydan buryn jasandy ıntellekt bolashaqta repetıtorlardy almastyra ala ma degen saýalǵa jaýap izdep kórgen edik.