Elordalyq mektepte oqýshylardyń qaýipsizdigi men tártibin jasandy ıntellekt baqylaıdy
ASTANA. KAZINFORM – Bul júıe úzilis kezinde oqýshylardyń qaýipsizdigi men tártibin anyqtap, kúmándi nemese agressıvti áreketterdi birden baıqaıdy. Bul týraly Astana qalasy ákimdiginiń baspasóz qyzmeti habarlady.
Astana qalasyndaǵy № 107 jalpy orta mektep — bilim berý salasynda zamanaýı tehnologııany tolyq engizgen alǵashqy oqý oryndarynyń biri. Bul keleshek mektebi búginde tolyqtaı tsıfrlyq júıege kóship, oqý úderisin de, tártipti de jańa deńgeıge kóterip otyr. Mekteptiń ishki jáne syrtqy beınebaqylaý kameralaryna jasandy ıntellekt (JI) júıesi ornatylǵan.
Eger oqýshyǵa ózge synyptasy kúsh kórsetse nemese ol mektep erejesin buzsa, JI kamerasy avtomatty túrde sol sáttiń beınejazbasyn mektep basshylyǵyna joldaıdy.
— Bizdiń mektep jasandy ıntellekt platformasyn alǵash engizgenderdiń biri. Júıe tek oqý sapasyn arttyrýǵa emes, sonymen qatar oqýshylardyń qaýipsizdigi men tártibin anyqtaýǵa múmkindik beredi. Osy tehnologııanyń arqasynda bilim alýshylar arasynda quqyqbuzýshylyq sany azaıdy, — deıdi mektep dırektory Aıgúl Bazarbaıqyzy.
Búginde № 107 mekteptiń tájirıbesi elordanyń ózge bilim ordalaryna da úlgi bolyp otyr. Jasandy ıntellektiń kómegimen mektep qaýipsizdigi kúsheıip, oqýshylardyń ózara qarym-qatynasy mádenıetti sıpat ala bastaǵan.
Aıta ketelik jasandy ıntellektini qoldaný: 300 myńǵa jýyq pedagog tegin kýrstan ótti.