Elordalyq kórkem gımnasshylar baıraqty básekede top jardy
ASTANA. KAZINFORM — Elordalyq kórkem gımnasshylar Grekııada ótken onynshy «Afrodıta kýbogy» halyqaralyq týrnırinde top jardy. Bul týraly qala ákimdigiginiń resmı saıty jazdy.
Astana qalasy ákimdiginiń №1 Balalar men jasóspirimderdiń mamandandyrylǵan olımpıadalyq rezerv sport mektebiniń sportshylary 9 altyn, 4 kúmis jáne 2 qola medal jeńip alyp, elimizdiń abyroıyn asqaqtatty.
Júlde úshin halyqaralyq arenada top jaryp júrgen úzdik sportshylar talasty. Astanalyq gımnasshylar baıraqty básekede AQSh, Italııa, Bolgarııa sportshylarymen básekelesip, aıqyn jeńiske jetti.
Kópsaıys nátıjeleri boıynsha, Erıka Jaılaýova men Aqmaral Erekesheva altyn medal ıelense, Aıym Meıirjanova qola medalǵa qol jetkizdi.
Toptyq jattyǵý boıynsha «Fýror» komandasy Andorra men Anglııa elderin artta qaldyryp, altyn medaldy qanjyǵasyna baılady.
Aqmaral Erekesheva dop jáne lenta jattyǵýlarynda 2 altyn, al sheńber men shyǵyrshyqtan 2 kúmis medalǵa ıe boldy. Erıka Jaılaýova doppen kúmiske, lentadan altynǵa qol jetkizdi. Aıym Meıirjanova lentadan kúmis medal aldy.
«Fýror» komandasy lenta jáne 3 dop + 2 sheńber jattyǵýlarynda 2 altyn medal jeńip aldy. Al «Vıktorı» komandasy sheńber jattyǵýynan qola medal ıelendi.
Buǵan deıin qazaqstandyq sportshylar kórkem gımnastıkadan Portýgalııadaǵy týrnırde júldeli orynnan kóringen bolatyn.