Elordalyq klınıka qaıtys bolǵan adamdardy ózine tirkep, memleketten qarjy alyp otyrǵan
ASTANA. KAZINFORM - Áleýmettik medıtsınalyq saqtandyrý qorynyń sarapshylary monıtorıng barysynda mindetti áleýmettik medıtsınalyq saqtandyrý (MÁMS) jáne tegin medıtsınalyq kómektiń kepildendirilgen kólemi (TMKKK) qarajattaryn paıdalanýda birqatar iri buzýshylyqtardy anyqtady.
Medıtsınalyq saqtandyrý qory baspasóz qyzmetiniń habarlaýynsha, emhana 16 myń azamatty ózine zańsyz tirkep, sol úshin 100 mln teńgeden astam paıda tapqan.
Áleýmettik medıtsınalyq saqtandyrý qory medıtsınalyq kómektiń sapasy men kólemderine turaqty túrde monıtorıng júrgizip otyrady. Qor atalǵan jumysty júrgizý nátıjesinde Astanadaǵy jekemenshik emhananyń 16 myń azamatty, onyń 13 myńnan astamy balany ózine zańsyz tirkegenin anyqtady. Azamattardy tirkeý Áleýmettik medıtsınalyq saqtandyrý qorynan qarjylandyrýǵa qol jetkizý úshin osy atalǵan tulǵalardyń nemese olardyń zańdy ókilderiniń kelisiminsiz jasalǵan.
Munyń sebebi, barlyq emhanalarǵa tegin medıtsınalyq kómektiń kepildik berilgen kóleminiń qarajatynan olarǵa bekitilgen árbir turǵyn úshin aıyna 1 617,64 teńge mólsherinde bazalyq tólem esepteledi. Bekitilgen halyqtyń jas koeffıtsıenti boıynsha soma árbir emhana boıynsha jeke retteledi. Nátıjesinde atalǵan klınıka memleketten árbir tirkelgen turǵyn úshin aıyna shamamen 1 800 teńge alyp otyrǵan.
Bul emhanaǵa shetelge turaqty nemese ýaqytsha turýǵa ketken adamdar tirkelgen. Sonymen qatar Qazaqstannyń basqa óńirlerinde turatyn azamattar da boldy. Turǵyndardyń elordalyq emhanaǵa eshqashan barmaǵany, alaıda medıtsınalyq qyzmet alǵandyǵy týraly 1414-ten habarlama alyp narazy bolǵandyǵy jóninde shaǵymdary bar.
Kepildik berilgen tólemnen bólek, emhana 16 myń azamat úshin naqty kórsetilmegen qyzmetterge MÁMS júıesinde tólem usynǵan. Sonymen birge Áleýmettik medıtsınalyq saqtandyrý qory 5-10 jyl buryn qaıtys bolǵandyǵy tirkelgen balalarǵa medıtsınalyq qyzmet «kórsetý» faktisin anyqtady.
Nátıjesinde elordalyq emhana jalpy somasy 100 mln teńgeden asatyn 33 myńnan astam qyzmetti «qosyp jazǵan».
Atalǵan fakti boıynsha materıaldar quqyq qorǵaý organdaryna berildi. Qazirgi ýaqytta Astana qalasynyń mamandandyrylǵan ekonomıkalyq sotynda Áleýmettik medıtsınalyq saqtandyrý qory men elordalyq emhana arasynda buzýshylyq úshin aıyppuldy qosa zańsyz alynǵan somany qaıtarý jóninde sot talqylaýy júrip jatyr.