Elordalyq kásipkerlerge tazalyqty saqtaý jóninde chek-paraqshalar taratyldy
ASTANA. KAZINFORM — «Taza Qazaqstan» aýqymdy ekologııalyq aktsııasy aıasynda elordalyq kásipkerlerge tazalyq pen tártipti saqtaý jónindegi usynymdar jazylǵan chek-paraqtar berildi, dep habarlaıdy qala ákimdiginiń resmı saıty.
Astana ákimdigi 2024 jyly kásipkerlerge arnap tazalyq pen tártipti jyl boıy saqtaý boıynsha usynymdary bar chek-paraqshalar ázirlegen bolatyn. Maýsymdyq erekshelikter eskerilip, olar tórt formatqa bólingen — kóktem, jaz, kúz jáne qys.
Óz aýmaqtaryn tıisti deńgeıde ustaýǵa arnalǵan maýsymdyq jospar Respýblıka dańǵyly boıynda ornalasqan jeke uıymdarǵa taratyldy.
— Alǵash ret eki jyl buryn ázirlengen arnaıy chek-paraqshalar ár maýsymǵa beıimdelgen usynymdardy qamtıdy jáne maýsymdyq erekshelikterdi eskeredi. Bul aktsııa qaladaǵy tazalyq pen tártipti saqtaýǵa 250 myńnan astam shaǵyn jáne orta bıznes sýbektilerin tartýǵa baǵyttalǵan. Bıznestiń bul jumysqa belsendi qatysýy elordanyń damýyna oń yqpal etedi, — dedi Astana qalasynyń Investıtsııalar jáne kásipkerlikti damytý basqarmasynyń bólim basshysy Shýhrat Joraev.
Qalyptastyrylǵan usynymdar qajetti jumystar tizimin qamtıdy. Máselen, kóktemde shatyrlardy qardan der kezinde tazalaý, jasyl jelekterdi butaý jáne otyrǵyzý qarastyrylǵan. Jaz mezgilinde aǵashtar men jasyl jelekterdi kútip-baptaý, sýarý júıesiniń jumysyn qamtamasyz etý, turaqty senbilikter ótkizý kózdelgen.
Kúzde kireberis aımaqtarǵa taıǵanaqqa qarsy jabyn ornatý, jylytý maýsymyna daıyndyq júrgizý qajet. Qysta kireberisterdi muzǵa qarsy qospamen óńdeý jáne kelýshilerdiń qaýipsizdigin qamtamasyz etý mindetteledi.
Aıta keteıik, bul usynymdardyń negizgi maqsaty — qala men qorshaǵan ortaǵa jaýapkershilik mádenıetin qalyptastyryp, damytý.
Budan buryn «Taza Qazaqstan» aktsııasy aıasynda Abaı oblysynda 4105 quqyqbuzýshylyqtyń joly kesilgeni anyqtaldy.
