Elordalyq eriktiler analar men qyz-kelinshekterge qýanysh syılap júr
ASTANA. KAZINFORM – «Astana jastary» jastar resýrstyq ortalyǵynyń eriktileri Halyqaralyq áıelder kúni merekesi qarsańynda elorda turǵyndaryn quttyqtap, gúldermen jáne shokaladtarmen qýantyp jatyr. Bul týraly elorda ákimdiginiń resmı saıty jazdy.
Eriktiler gúl shoqtary men shokaladty qalanyń turǵyndar tyǵyz qonystanǵan jerlerinde áıel adamdarǵa syılap jatyr. Aktsııa jyl saıyn ótkiziledi.
«Bizdiń maqsatymyz – názik jandylarǵa merekelik kóńil kúı syılaý. Qymbatty hanymdarǵa baqyt, densaýlyq jáne amandyq tileımin», - dedi eriktilerdiń biri Erasyl Amantaı.
Astanalyqtar óz kezeginde kórsetilgen qurmetke rıza bolyp, jastardyń nıetine alǵys bildirdi.
«Barlyǵyna kóp raqmet! Kútpegen jerden kóńil kúı birden kóterildi. Árbir áıelge zor baqyt tileımin!» - dedi Aınur Smaıylova.
Aktsııa áli de jalǵasyp jatyr. Eriktiler astanalyq analar men arýlarǵa 1000-nan asa gúl men shokalad syılaıdy.
