Elordalyq aǵaıyndy jas shahmatshylar Azııa chempıony atandy
ASTANA. KAZINFORM — Aǵaıyndy Aldııar Jaýynbaı men Álimjan Jaýynbaı Sıngapýrda ótken 24th ASEAN+ Age-Group Chess Championships 2026 halyqaralyq shahmat chempıonatynda tórt medal ıelendi. Onyń úsheýi — altyn, bireýi — kúmis, dep habarlaıdy elorda ákimdiginiń resmı saıty.
— FIDE sheberi Aldııar Jaýynbaı 20 jasqa deıingi sportshylar arasynda rapıd pen blıts boıynsha baq synady. Rapıdte 5,5 upaı, blıtste 7 upaı jınap, eki dıstsıplınada da altyn medal jeńip aldy. Al klassıkalyq shahmatta 4-orynnan kórinip, júldege bir qadam qaldy. Al onyń inisi, FIDE sheberi Álimjan Jaýynbaı 12 jasqa deıingi jasóspirimder sanatynda óner kórsetti. Jas shahmatshy blıts boıynsha 8 upaı jınap, altyn medalǵa ıe boldy. Sonymen qatar klassıkalyq shahmatta kúmis júldeni jeńip aldy. Osylaısha, aǵaıyndy Jaýynbaılar Sıngapýrdaǵy halyqaralyq dodada Qazaqstan qorjynyna tórt medal saldy, — delingen taratylǵan aqparatta.
Jas shahmatshylardyń halyqaralyq jarystaǵy jetistigi — júıeli daıyndyq pen turaqty eńbektiń nátıjesi. Aǵaıyndy Jaýynbaılar elordalyq balalar men jasóspirimder arasyndaǵy shahmattyń damyp kele jatqanyn kórsetip, Qazaqstannyń kók týyn halyqaralyq arenada bıikke kóterdi.
Aldııar men Álimjan Jaýynbaı — KazChess daryndy jastardy qoldaý baǵdarlamasynyń qatysýshylary. Baǵdarlama jas shahmatshylardyń kásibı sheberligin arttyryp, halyqaralyq jarystarǵa júıeli túrde daıyndalýyna múmkindik beredi.
Aıta keteıik, Aldııar Jaýynbaı 11 jasynda Qazaqstan tarıhyndaǵy eń jas FIDE sheberi atanǵan bolatyn. Búginde ol halyqaralyq jarystarda el namysyn qorǵap júrgen bolashaǵy zor jas shahmatshylardyń biri.
Buǵan deıin Dınara Sádýaqasova óńirlerdegi jas shahmatshylarǵa shákirtaqy taǵaıyndaǵanyn jazdyq.
