7 jasar oqýshy halyqaralyq ǵylymı olımpıadada altyn medal aldy

ASTANA. KAZINFORM — Astana qalasy № 81 Astana English school halyqaralyq mektebiniń 1-synyp oqýshysy Nurlan Nurdaýlet halyqaralyq «StemCo» halyqaralyq olımpıadasyna qatysyp altyn medal ıelendi.

Elorda ákimdiginiń resmı saıtynyń málimetinshe, sol sııaqty 4-synyp oqýshysy Zere Aqbolat úshinshi orynǵa ıe bolyp, qola medal enshiledi.

Alǵashqy onlaın kezeńnen súrinbeı ótken jeti jastaǵy oqýshy Sıngapýr qalasynda ótetin fınaldyq kezeńge joldama aldy.

Ótken jyly ǵana mektep tabaldyryǵyn attaǵan Nurlan Nurdaýlet «Matematıka jáne science» páni boıynsha úzdik nátıje kórsetip, qarsylastary ishinen oza shaýyp, birinshi orynǵa taban tirep, elimizdiń atyn asqaqtatty.

Al el namysyn qorǵaǵan Zere Aqbolat «Jaratylystaný» páni boıynsha baq synap, qola medal enshiledi.

Eske salsaq, búgin astanalyqtar short-trekten el quramasyn saltanatpen qarsy alǵanyn jazdyq.