Elordaǵa jyl basynan beri 1251 Reseı azamaty kelgen
Bul málimetterdi Nur Sultan qalasy Polıtsııa departamentiniń baspasóz qyzmeti taratty.
Baspasóz qyzmetiniń málimetterine qaraǵanda, elordada sheteldikterdiń bolýyn baqylaýdyń tıimdiligin odan ári arttyrý, zańsyz kóshi-qondy anyqtaý jáne jolyn kesý maqsatynda «Mıgrant» jedel-aldyn alý is-sharasyn ótip jatyr.
Elordalyq garnızon qyzmetkerleri jedel aldyn alý is-sharalaryn ótkizý kezinde sheteldikterdiń Qazaqstanda bolý erejelerin buzýdyń 633 faktisin anyqtady.
Bıylǵy jyldyń basynan beri kelgen sheteldikterdiń 10 myńǵa jýyǵy TMD azamattary, al alys shet elderden 3,5 myńnan astam adam keldi.
«Mysaly, elordaǵa alys shetelden ýaqytsha kelgen azamattardyń ishinde 369 Túrkııa ókili, 148 Úndistan jáne 317 Ulybrıtanııa azamaty bar. Elordada jyl basynan beri TMD elderinen 6200-den astam Ózbekstan azamaty, 1251 Reseı azamaty, 871 Qyrǵyzstan azamaty jáne Tájikstannan 973 adam keldi. Negizinen sheteldikter elordaǵa jumys isteýge keledi, osyndaı maqsatpen kelgen shamamen 10 myń azamat tirkeldi. Elordaǵa oqýǵa 588 sheteldik stýdent kelgen.
2022 jyldyń basynan beri Qazaqstan Respýblıkasynda bolý erejelerin buzǵany úshin 1814 shetel azamaty anyqtalyp, ákimshilik jaýapqa tartyldy. Sot sheshimimen elden 410 sheteldik shyǵaryldy»,-delingen habarlamada.
Polıtseıler shyǵaryp jiberý týraly sheshimniń oryndalmaýy qylmystyq jazalanatyn áreket bolyp tabylatynyn jáne qylmystyq zańnamaǵa sáıkes jaýapqa tartylatynyn atap ótti.
«Kóshi-qon qyzmetiniń ókilderi elordada sheteldikterdiń bolýyn, olardyń shetel azamattarynyń quqyqtyq jaǵdaıy týraly zańnama talaptaryn saqtaýyn, olardyń elden ýaqtyly ketýin turaqty túrde baqylaıdy. Qala aýmaǵynda zańsyz kóship-qonýshylar men ishki ister organdarynda ýaqtyly tirkelmegen tártip buzýshylardy anyqtaý úshin júıeli túrde reıdter júrgiziledi»,-delingen baspasóz qyzmeti taratqan aqparatta.