Elordaǵa jolaýshylardyń basym bóligi PTR anyqtamasymen keledi
NUR-SULTAN. QazAqparat – Bir táýlikte elordaǵa 5 reıspen 995 adam keldi, onyń ishinde 985 jolaýshyda teris nátıjesi bar PTR anyqtamasy boldy.
Bul týraly Nur-Sultan qalasynyń bas memlekettik sanıtar dárigeri Sarhat Beısenova aıtyp berdi, dep habarlaıdy QazAqparat tilshisi.
«Bir táýlik ishinde 5 reıspen 995 adam keldi, onyń ishinde teris nátıjesi bar PTR anyqtamamen – 985 adam kelip, 10 adam karantındik statsıonarǵa jatqyzyldy jáne tekserildi, barlyǵynyń nátıjeleri – teris», - dep tolyqtyrdy S. Beısenova elorda ákimdiginde ótken onlaın brıfıngte.
Onyń aıtýynsha, 2 qazannan bastap 691 reısten 92 689 adam keldi, onyń ishinde 75 503 jolaýshyda teris nátıjeli PTR anyqtamasy bolǵan. 15 adam deportatsııalandy, 17 186 adam karantındik statsıonarǵa jatqyzyldy jáne tekserildi jáne 44-inde KVI oń nátıjesi anyqtaldy.
«KVI dıagnostıkasy boıynsha qalada táýliktik qýaty 12 955 zertteýge jetetin 24 zerthana jumys isteıdi. Jyl basynan beri barlyǵy 315 891 zertteý ótken, oń nátıjeli – 12 621, onyń ishinde qaıtalama jáne baqylaý taldaýlary júrgizilgen», - dedi S. Beısenova.
Buǵan deıin Sarhat Beısenova elordadaǵy KVI juqtyrý statıstıkasyn jarııalaǵan edi. Elordada koronavırýs juqtyrǵandar kúnine 150-den 280-ge deıin tirkeledi.
Sonymen birge, S. Beısenova qandaı jaǵdaıda karantın talaptary kúsheıtiletinin túsindirdi.
Mektep oqýshylaryna kelsek, qashyqtan oqıtyndar arasynda KVI juqtyrý jaǵdaıy kóbeıgen.
