Elordaǵa jas qalamger tartýy
ASTANA. QazAqparat - Astana tórinde alǵash ret 22-28 qyrkúıek aralyǵynda Qanat Júnisovtiń shyǵarmashylyq aptalyǵy ótedi. «Jas qala, jas qalamger» atty aıdar taqqan kesh ánshi, aqyn, dramatýrgtyń qalamynan týǵan týyndylarǵa arnalady, dep habarlady astana.gov.kz.
«Qyryqtyń qyrqasyna shyqtym, odan keıin shyǵarmashylyǵyma 20 jyl toldy. Biraq, 60, 70 jas emes. Mereıtoı deýge kelmes. Shyǵarmashylyq aptalyq», -dedi aqyn, dramatýrg Qanat Júnisov.
Dástúrli ánnen bastalyp, estradalyq ánmen órilip, birneshe qoıylym sahnalanady. Óner ıesin quttyqtaýǵa Túrkistan qalalyq sazdy drama teatry men Aqmola oblystyq qazaq drama teatry arnaıy keledi.
«Bir kúndik shyǵarmashylyq kesh jasaǵym kelmedi. Sodan keıin zamandastarymnyń, halyqtyń nazaryn dramatýrgııaǵa burǵym keldi», dep atap ótti Qanat.
Ol búginge deıin birneshe pesa, 200-den astam ánge sóz jazǵan. Shyǵarmashylyq aptalyq aıasynda onyń «Sáken - suńqar» tragedııalyq dramasynyń tusaýy kesiledi. Segiz qyrly, bir syrly azamattyń ónerin áriptesteri de joǵary baǵalaıdy.
«Mahabbat melodramasynda» Nurjamaldyń rólin somdadym. Qanattyń shyǵarmasynda oınaǵanyma óte qýanamyn. Jaqsy ról, ananyń róli, janyma óte jaqyn. Sahnaǵa óte yńǵaıly jazylǵan. Jetik, oıy ushqyr. Áli de alar bıigi alda bolsyn. Qazaqtyń maqstanysh, búgingi Sákeni», - degen pikirin jetkizdi Q. Qýanyshbaev atyndaǵy memlekettik akademııalyq qazaq mýzykalyq drama teatrynyń aktrısasy Baqyt Isabekova.
Elorda tórindegi formaty ózgeshe shyǵarmashylyq aptalyq Astana qalasy Mádenıet basqarmasynyń qoldaýymen ótedi.
