Elordaǵa jarty jylda 750 myńnan astam týrıst keldi

ASTANA. KAZINFORM – Astanaǵa 2025 jyldyń alǵashqy alty aıynda kelgen sheteldik týrıster sany ótken jylmen salystyrǵanda 9%-ǵa artty, dep habarlaıdy elorda ákimdiginiń resmı saıty.

Qalalyq ınvestıtsııalar jáne kásipkerlikti damytý basqarmasynyń málimetinshe, 2025 jyldyń alǵashqy jarty jyldyǵynda Elordaǵa shamamen 750 myń týrıst kelgen. Bul ótken jylmen salystyrǵanda 9%-ǵa kóp. Onyń ishinde 180 myń – sheteldik qonaqtar, olardyń basym bóligi Reseı, Qytaı, Túrkııa, AQSh jáne Germanııa elderinen kelgen.

«Astana mádenıet, sport, medıtsına jáne ınnovatsııalar toǵysatyn alańǵa aınalyp keledi. Týrıster tarapynan da, halyqaralyq seriktester tarapynan da qyzyǵýshylyqtyń artqanyn baıqap otyrmyz», – dedi «Astana Tourism» týrızmdi damytý ortalyǵy basqarmasynyń tóraǵasy Artem Kvashýk.

Búginde Astanada 100-den astam týrıstik nysan bar, onyń ishinde murajaılar, teatrlar, galereıalar, dinı jáne sporttyq ǵımarattar bar. Qonaqtardyń yńǵaılylyǵy úshin zamanaýı navıgatsııalyq júıe engizilip, ınfokıosk pen ekskýrsııalyq qyzmetter jumys isteıdi, tsıfrlyq sheshimder iske qosylǵan.

Halyqaralyq áýejaıda qonaqtarǵa arnalǵan biregeı Taxi Point qyzmeti iske qosyldy – Qazaqstanda alǵash ret mobıldi qosymshasyz, táýlik boıy jumys isteıtin taksı tapsyrys termınaldary. Bul júıe jeti tilde qoljetimdi bolyp, qalaǵa jyldam ári qaýipsiz jetýdi qamtamasyz etedi.

Ekskýrsııalyq baǵyt ta belsendi damyp keledi. 100-den astam baǵytty qamtıtyn reestr qalyptastyrylǵan, onyń ishinde taqyryptyq, sholý jáne jeke týrlar bar. Maman daıarlaýǵa erekshe kóńil bólinýde: bıyldyń ózinde 50 kásibı gıd Qazaqstannyń Bas meshiti bazasynda oqý oqyp, ekskýrsııa júrgizýge akkredıtatsııa aldy. Buǵan qosa, Qytaıdan keletin týrısterge qyzmet kórsetý úshin qytaı tilin meńgergen 20 ekskýrsovod daıyndaldy.

Týrızmdi damytý strategııasyn júzege asyrý maqsatynda týrıstik ınfraqurylym, qonaq úı bıznesi, MICE segmenti jáne gastronomııa men iri is-shara ındýstrııasynyń tanymal mamandary kiretin Saraptamalyq keńes quryldy. Keńes ınnovatsııalyq týrıstik baǵdarlamalar ázirleýmen jáne salanyń eń joǵary standarttaryna saı strategııa jasaýmen aınalysady.

Elordada iskerlik, is-shara jáne medıtsınalyq týrızm baǵyttary damyp keledi. 2024 jyly 128 iri halyqaralyq shara ótkizilse, 2025 jylǵa 200-den astamy josparlanǵan. Olardyń qatarynda 89-shy IFLA Dúnıejúzilik kitaphana jáne aqparat kongresi, Astana International Forum, sondaı-aq neırohırýrgııa qaýymdastyǵynyń 10-shy halyqaralyq kongresi bar. IFLA kongresine 114 elden 1600-den astam delegat qatysty.

Astananyń mádenı ortalyq retindegi mártebesin jaqynda ótken Jennifer Lopez kontserti de aıqyndady – sharaǵa 30 myńnan astam kórermen jınaldy, olardyń 10 myńy sheteldik týrıster boldy. Mastercard derekteri boıynsha, Astanada týrıstiń táýliktik ortasha shyǵyny 118 myń teńgege jetedi, bul salanyń joǵary ekonomıkalyq tıimdiligin kórsetedi.

21 qyrkúıekte ótken Backstreet Boys kontserti de jyldyń eń kóp kórermen jınaǵan sharalarynyń birine aınaldy. Oǵan 45 elden 12 myńnan astam týrıst keldi. Olardyń qatarynda Germanııa, Polsha, Frantsııa, Túrkııa, Fınlıandııa, Lıtva, Estonııa, Chehııa, Serbııa, Grekııa, Ázerbaıjan, Reseı, Ózbekstan jáne basqa da memleketter bar.

Bıyldan bastap Astanada ónerkásiptik týrızm belsendi damyp keledi. Qazirgi tańda týroperatorlar «ıÝtarııa» tigin fabrıkasyna, «MFA International» respırator zaýytyna, «MODEX» temirbeton qurylymdary zaýytyna, «Aromat» kásipornyna, «StalTsınk» zaýytyna jáne Astana elektrotehnıkalyq zaýytyna (AETZ) ekskýrsııalar ótkizýde. Týrıster Elordanyń ónerkásip sektorynyń tarıhymen, zamanaýı damýymen jáne ınnovatsııalyq áleýetimen tanysady.

Sonymen qatar, bilim berý týrızmi de qarqyndy damýda. Jyl sońyna deıin 12 500-den astam mektep oqýshysy men kolledj stýdenti kásibı baǵdar berý ekskýrsııalaryna qatysyp, bilimin keńeıtip, bolashaq mamandyǵyn tańdaýǵa múmkindik alady.

Astanadaǵy jańa ári bolashaǵy zor baǵyttardyń biri – golf-týrızm. Qala alǵash ret halyqaralyq golf alańy retinde týrıstik ónimin usyna bastady.

Aıta keteıik, Májilis depýtaty medıtsınalyq týrızmdi damytý ulttyq baǵdarlamasyn ázirleýdi usyndy.