Elordaǵa taǵy bir aıyppul kólik turaǵy qajet
ASTANA. QazAqparat - Astanada úshinshi aıyppul turaǵyn salý josparlanyp otyr, dep habarlaıdy QazAqparat qala ákimdiginiń saıtyna silteme jasap.
Qazir qalada Alash tas jolyndaǵy jáne N. Tilendıev dańǵylyndaǵy mamandandyrylǵan eki avtoturaq jumys isteıdi. Al, qalalyq Kólik jáne jol-kólik ınfraqurylymyn damytý basqarmasy «Kóktal-2» mańynan 5,1 gektar jer telimine taǵy da bir turaq salýdy kózdep otyr.
«Búginde kólik qoıylatyn eki arnaıy avtoturaq tolyp ketti. Onda uzaq turyp qalǵandyqtan júrýge jaramsyz kólik kóp. Alash tas joly boıynda 541 kólik, N.Tilendıev dańǵyly boıyndaǵy turaqta 600 kólik tur», - dep málim etti qalalyq Kólik jáne jol-kólik ınfraqurylymyn damytý basqarmasy basshysynyń orynbasary Álıhan Qýatbekov.
Ol qalalyq ákimdiktegi qoǵamdyq keńeste «Astana qalasynyń aýmaǵyndaǵy avtoturaq uıymdarynyń erejesin bekitý týraly» qaýlysyn ózgertýdi usyndy.
Sonymen qatar jańa mamandandyrylǵan turaq salýdyń qajettiligi týyndaǵan. Qazirgi ýaqytta jobalyq-smetalyq qujattama jasalyp jatyr. «Avtoturaq «Kóktal-2» turǵyn úı alabyndaǵy mamandandyrylǵan HQKO qasyna, 5,1 ga jer telimine salynady. Jyl sońyna deıin saraptama qorytyndysyn alýymyz kerek», - dedi basqarma basshysy.
