Elordaǵa sheteldik týrıster qaı elderden kóp keledi
ASTANA.KAZINFORM – Astanaǵa keletin sheteldik týrısterdiń basym bóligi Reseı, Qytaı, Túrkııa, AQSh jáne Germanııadan keledi. Bul týraly «Astana Tourism» týrızmdi damytý ortalyǵynyń týrıstik baǵyttar men qyzmetterdi damytý departamentiniń dırektory Olga Abeldınova aıtty.
Elordaǵa degen týrıstik qyzyǵýshylyqtyń artýy ekonomıkalyq kórsetkishterden de baıqalady.
– Eger 2022 jyly kórsetilgen týrıstik qyzmetterdiń kólemi 35 mlrd teńgeni qurasa, 2023 jyly bul kórsetkish 45 mlrd teńgege, 2024 jyly 65 mlrd teńgege jetti. Al 2025 jyldyń qorytyndysy boıynsha 74 mlrd teńgeni qurady. Bul aldyńǵy jylmen salystyrǵanda 14 paıyzǵa joǵary. Osylaısha, týrızmniń qala ekonomıkasyna qosatyn úlesi artyp kele jatqanyn kórip otyrmyz, – dedi ol AIMAQ podkastynda.
Sarapshynyń túsindirýinshe, týrısterdiń jumsaıtyn qarajaty qalanyń birneshe ekonomıkalyq salasyna tıesili. Olardyń qatarynda qonaqúı bıznesi, qoǵamdyq tamaqtaný oryndary, kólik, saýda, mádenı nysandar men oıyn-saýyq ındýstrııasy bar.
Sonymen qatar qala aldynda týrıster sanyn kóbeıtýmen qatar, olardyń elordada bolý ýaqytyn uzartý mindeti tur. Osy maqsatta saýyqtyrý, qala ishindegi jáne qala syrtyndaǵy demalys baǵdarlamalaryn qosa alǵanda, jańa týrıstik usynystar ázirlenip jatyr.
– Qazir iskerlik saparmen keletin týrısterge arnalǵan jańa Wellness baǵdarlamalaryn, qala ishindegi jáne qala syrtyndaǵy demalys baǵyttaryn usynyp jatyrmyz. Sonyń nátıjesinde iskerlik maqsatta kelgen qonaqtar burynǵydaı úsh kún emes, bes kúnge deıin aıaldaı bastady.
Olar negizgi jumys baǵdarlamasyna qalanyń kórikti jerlerin aralaýdy, saýda ortalyqtaryna barýdy jáne qala syrtyndaǵy saıahattardy da qosyp júr, – dedi Olga Abeldınova.
Aıta keteıik, ishki týrızm 84,4% ósti.
