Elordaǵa koronavırýsqa qarsy vaktsınanyń 2 myńnan astam dozasy jetkizildi
NUR-SULTAN. QazAqparat – Reseılik «Spýtnık- V» vaktsınasynyń 2 030 ekinshi komponenti elordanyń Densaýlyq saqtaý basqarmasyn qoımasyna jetkizildi, dep habarlaıdy QazAqparat tilshisi.
Atalǵan basqarma baspasóz qyzmetiniń málimetinshe, eki komponenttiń syrtqy beınesi tús aıyrmashylyǵymen erekshelendi. Birinshisi - kók, al ekinshi komponent qyzyl tústi. Bir flakon 5 adamǵa ekpe saldyrýǵa arnalǵan.
Kelip túsken jańa dozalar birinshi kezeńde vaktsınatsııalaý úshin belgilengen qalalyq emhanalarǵa tapsyryldy. Bul dozalarmen aýrýhanalardyń medıtsınalyq qyzmetkerlerin, jedel-járdem brıgadalardyń feldsherlerin, súzgi kabınettiń qyzmetkerlerin jáne basqalardy vaktsınatsııalaý jalǵasady.
21 kúnnen keıin tıisti ekinshi ekpesin Qoǵamdyq densaýlyq saqtaý basqarmasynyń basshysy Tımýr Muratov ta aldy. Emshara bólmesiniń qyzmetkerleri Muratovtyń hálin suraǵan kezde, densaýlyq jaǵdaıynyń syr bermegenin jetkizdi.
«Kishkene álsizdik baıqaldy. Biraq vaktsınadan keıingi múmkin bolatyn áserlerden habardar edim. Koronavırýs juqtyryp, aýyryp qalý qorqynysh sezimi oǵan qarsy ekpe alýdan álde qaıda joǵary» ,- dedi Tımýr Muratov.
Jalpy elorda boıynsha vaktsınatsııalaý bastalǵaly beri 2008 adam ekpe aldy. Jospar - 5 700 adamǵa ekpe saldyrtý.
Aıta keteıik Nur-Sultan qalalyq qoǵamdyq densaýlyq saqtaý basqarmasynyń basshysy Tımýr Muratov 1 aqpan kúni koronavırýsqa qarsy ekpe saldyrǵan bolatyn.
