Elordaǵa kirip-shyǵýǵa tyıym salý máselesi qarastyrylyp otyrǵan joq - Sarhat Beısenova
«Ótken aptada Qazaqstan aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııa elimizdegi COVID-19-ben naýqastaný ósimin eskere otyryp, qandaı da bir óńir epıdemıologııalyq táýekeldiń «sary» aımaǵyna ótken jaǵdaıda engiziletin qosymsha is-sharalar týraly sheshim qabyldady. Onyń ishinde naýqaspen tyǵyz qarym-qatynasta bolǵandardy qashyqtan jumys isteý formatyna kóshirý, COVID-19-ǵa qarsy ekpe saldyrýǵa bolmaıtyn qyzmetkerler men júkti áıelderdi qashyqtan jumys isteý formatyna aýystyrý sharalary bar», - dedi Sarhat Beısenova agenttik tilshisiniń saýalyna oraı.
Onyń atap ótýinshe, Ashyq qosymshasyn qaıtadan iske qosý, Nur-Sultan qalasyna kirýge jáne shyǵýǵa tyıym salý kózdelip ootyrǵan joq. Degenmen qala turǵyndaryna adamdar jappaı jınalatyn jerge barǵanda, qoǵamdyq kólikke otyrǵanda maska taǵý usynylady.
«Ár adam, ásirese sozylmaly aýrýlary bar jandar densaýlyǵyna tónetin táýekel men qaýipti túsinýi tıis. Olardan adamdar kóp jınalatyn jerge barǵanda maska taǵyp, barlyq qaýipsizdik is-sharalaryn saqtaýǵa keńes beremiz. Ekpe nemese qaıtadan vaktsınatsııa almaǵan turǵyndarǵa ujymdyq ımmýnıtetti kóterý úshin der ýaqytynda vaktsına alý mańyzdylyǵyn jáne qajettiligin eske salamyn», - dedi ol.
Foto: www.gov.kz
