Elordaǵa kelgen týrıster sany 12%-ǵa artty
ASTANA. KAZINFORM – 2026 jyldyń alǵashqy úsh aıynda Astanaǵa 352 myń týrıst keldi. Bul ótken jyldyń sáıkes kezeńimen salystyrǵanda 12%-ǵa kóp, dep habarlaıdy elorda ákimdiginiń resmı saıty.
Qalaǵa kelgen týrısterdiń 68 myńy – sheteldik qonaqtar. Sonymen qatar iri halyqaralyq, mádenı jáne iskerlik is-sharalar elordaǵa týrıst tartýdyń mańyzdy faktorlarynyń birine aınalyp otyr.
2026 jyldyń birinshi toqsanynyń qorytyndysy boıynsha Astana qonaq úıleri kórsetken qyzmet kólemi byltyrǵy sáıkes kezeńmen salystyrǵanda 21%-ǵa ósti.
Qala qonaqtarynyń yńǵaılylyǵy úshin elordada 129 jaıaý júrginshi kórsetkishi jáne Visit Astana resmı týrıstik portalyna baǵyttaıtyn QR-kodtary bar 93 aqparattyq pılon ornatylǵan. Portaldan Astana, qalanyń kórikti jerleri men týrıstik nysandary týraly qajetti aqparat alýǵa bolady.
Sondaı-aq qalada 2 týrıstik-aqparattyq dúńgirshek pen 5 Taxi Point termınaly jumys isteıdi. Astanamen óz betinshe tanysqysy keletin týrıster úshin 8 tildegi aýdıogıdpen jabdyqtalǵan Red Bus ekskýrsııalyq avtobýsy qatynaıdy.
– Qazir elordada týrıster bara alatyn 100-den astam nysan bar. Qala qonaqtaryna ekskýrsııa ótkizetin 140-tan astam kásibı gıd jumys isteıdi. Sonymen qatar qoljetimdi týrızmdi damytýǵa erekshe nazar aýdarylyp, 5 ınklıýzıvti týrıstik marshrýt ázirlendi, – delingen habarlamada.
Ótken jyly Astana TMD elderi arasynda Eýropalyq qoljetimdi týrızm jelisiniń (ENAT) alǵashqy múshesi atandy.
Elordada iskerlik jáne oqıǵalyq týrızm de belsendi damyp keledi. 2026 jyldyń jeti aıynda qalada 957 is-shara ótkizilgen. Ákimdik málimetinshe, bul kórsetkish ótken jyldyń sáıkes kezeńimen salystyrǵanda 30%-ǵa artqan. 2025 jyldyń jeti aıynda 858 is-shara uıymdastyrylǵan.
Bıyl Astanada birqatar iri halyqaralyq is-shara ótti. PGL Astana 2026 týrnırine shamamen 25 myń adam qatysyp, onyń onlaın-aýdıtorııasy 50 mln kórermennen asty.
Comic Con Astana 2026 is-sharasyna shamamen 76 myń adam kelgen. Onyń 12 myńǵa jýyǵy – týrıster.
Automechanika Astana kórmesine 15 myńnan astam adam qatysyp, oǵan 45-ten astam eldiń ókilderi kelgen. Al Eurasian Book Fair halyqaralyq kitap kórmesi 15 eldiń ókilderin jınady.
Aıta keteıik, Balqash bıylǵy shomylý maýsymynda 200 myńǵa jýyq týrıst qabyldady.
