Elordaǵa kelgen myń jarym jolaýshynyń úsheýinen koronavırýs tabyldy
NUR-SULTAN. QazAqparat – 22-25 naýryz kúnderi Nur-Sultan qalasynyń halyqaralyq áýejaıyna 1483 jolaýshy keldi jáne 3 adamnan koronavırýs ınfektsııasy tabyldy, dep habarlaıdy QazAqparat.
Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova aıtyp berdi, dep habarlaıdy QazAqparat.
«Nur-Sultan qalasyna tótenshe jaǵdaı rejıminiń engizilýine baılanysty, elordanyń halyqaralyq áýejaıyna kelgen barlyq jolaýshyny oqshaýlaý uıǵaryldy. Osy jumys aıasynda biz 22-25 naýryz aralyǵynda halyqaralyq áýejaıǵa kelgen 18 reıstiń 1483 jolaýshysyn oqshaýlardyq», - dedi basqarma basshysy «Habar 24» telearnasynda ótken brıfıngte.
Olardyń barlyǵyna bıomaterıal alý jolymen zerthanalyq tekserý júrgizilgen
«Bul jolaýshylar arasynda 3 adamnan koronavırýs ınfektsııasy tabyldy. Olardy aýrýhanaǵa jatqyzý, em taǵaıyndaý jáne jaqyn baılanysqan adamdar tobyn anyqtaý jumystary júrgizildi», - dedi S. Qısyqova.
Aıta keteıik, Qazaqstan Respýblıkasy aýmaǵynda koronavırýs ınfektsııasyn juqtyrǵan jalpy 109 naýqas tirkeldi.
Nur-Sultan qalasynda 61 adamda koronovırýs ınfektsııasy anyqtaldy. Almaty qalasynda - 40 adam, Shymkent qalasynda – 2 adam, Qaraǵandy qalasynda - 2, Almaty, Aqtóbe, Jambyl, Soltústik Qazaqstan oblystarynda – 1 adamnan tirkelgen.
Buǵan deıin basqarma basshysy Nur-Sultanda tórt naýqastyń jaǵdaıy aýyr ekenin málimdegen bolatyn.
