Elordaǵa keletin gaz baǵasy qansha bolady

ASTANA. QazAqparat - Aldaǵy jyly «Saryarqa» gaz qubyrynyń magıstrali arqyly Astanaǵa keletin kógildir otynnyń ortasha baǵasy belgili boldy. Bul týraly QR Energetıka vıtse-mınıstri Maǵzum Myrzaǵalıev Ortalyq kommýnıkatsııalar ortalyǵynda ótken baspasóz máslıhatynda málim etti, dep habarlaıdy QazAqparat tilshisi.

«Árıne gaz kómirge qaraǵanda qymbattaý bolady. Qazirgi gaz tutynýshylar naryǵynyń baǵasymen eseptesek, gazdyń ár tekshe metri 47-50 teńge bolady. Salystyrar bolsaq, búginde elimizdiń ońtústik óńirinde gazdyń ár tekshe metri 33-35 teńgeni quraıdy. Demek, Astanada gaz qymbatqa túsedi. Elimizdi gazdandyrý jumysynyń nátıjesi kórsetkendeı, turǵyndar kómirden gazǵa eshqandaı kedergisiz kóshýde. Statıstıkaǵa súıensek, bir úıdi gazǵa qosý jumysyna 150 myń men 500 myń teńge aralyǵynda jumsalady», - dedi M.Myrzaǵalıev.

Energetıka vıtse-mınıstriniń aıtýynsha, 2019 jyldyń І toqsanynda elordaǵa gaz tartatyn JEO-1 jáne JEO-2 keshenderiniń qurylysy bastalady. Ol boıynsha aldymen Astananyń Kóktal jáne Ońtústik-shyǵys shaǵyn aýdandary kógildir otynmen qamtylatyn bolady.

«Jylý berý maýsymy boıynsha eseptesek, jeke turǵyn úı úshin aı saıyn 520 tekshe metr gaz qajet, ıaǵnı ol aıyna 25 myń teńgeni quraıdy. Al jaz mezgilderinde jylýsyz 5,5 myń teńgege baǵalanady. Jalpy ortasha eseppen alsaq, aı saıyn jeke turǵyn úı úshin gazdyń baǵasy 15,5 myń teńgege shyǵady», - dedi ol.

Buǵan deıin habarlaǵanymyzdaı, «Saryarqa» magıstraldyq gaz qubyry Qyzylorda-Jezqazǵan-Qaraǵandy-Temirtaý-Astana qalalarynan bólek, magıstral boıynda ornalasqan 117 eldi mekendi kógildir otynmen qamtıtyn bolady.