Elordaǵa qatynaıtyn avtobýstar jappaı tekserildi
ASTANA. QazAqparat - Astanalyq polıtseıler, Kóliktegi baqylaý ınspektsııasy men Astana qalasy Jolaýshylar kóligi jáne avtomobıl joldary basqarmasynyń qyzmetkerlerimen qalaǵa syrttan keletin qoǵamdyq avtobýstardy jappaı tekserdi, dep habarlady astana.kz.
Tekseris barysynda 305 ákimshilik hattama toltyryldy. Onyń ishinde 100-den astam avtobýstan tehnıkalyq aqaý shyǵyp, 4-eýi jyldamdyqty asyrǵan. Taǵy 21-i tehnıkalyq tekserýden múlde ótpegen bolsa, 17 kólik saqtandyrylmaǵan. Tehnıkalyq aqaýymen jolǵa shyqqany úshin avtobýs parkteriniń zańdy tulǵalaryna 4 ákimshilik hattama toltyryldy. Búginde qala aýmaǵynda 6 Jol-patrýldik polıtsııa beketi bar. Kúnine qalaǵa 100-den astam avtobýs qatynaıdy. Sondyqtan, avtobýstardyń tehnıkalyq sapasy men jol erejesiniń buzylmaýy qatań baqylaýǵa alynǵan. «Statıstıkaǵa súıensek, Astana qalasynyń aýmaǵynda jyl basynan beri avtobýstarǵa qatysty 24 jol-kólik oqıǵasy tirkelgen. Onda 3 adam qaza taýyp, 33 adam jaraqattanǵan. Onyń ishinde avtobýs júrgizýshileriniń kinásinen bolǵan jol-kólik oqıǵalarynda 17 adam qaza taýyp, 18 adam jaralanǵan», - dedi Astana qalasy ІІD ÁPB erekshe tapsyrmalar jónindegi aǵa ınspektory Baqytjan Altybaı.
