Elordaǵa qatynaıtyn 4 jolaqty joldardyń sany artady
NUR-SULTAN. QazAqparat – Bıyl Almaty-Óskemen tasjolynyń Taldyqorǵan-Óskemen ýchaskesinde kúrdeli jóndeý aıaqtalady, dep habarlaıdy QazAqparat tilshisi.Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda osyndaı málimet aıtty.
«Qazirgi tańda 15 avtojol jobasy júzege asyrylyp jatyr. Jyl qorytyndysynda 768 shaqyrymdyq Taldyqorǵan-Óskemen ýchaskesin rekonstrýktsııalaýdy tolyq aıaqtaý josparlanǵan. Bul – Orta Azııa respýblıkalaryn Reseıdiń Shyǵys-Sibir aımaǵymen jáne Qazaqstannyń ońtústigin shyǵyspen baılanystyratyn halyqaralyq tranzıttik dáliz», - degen mınıstr atalmysh dálizdiń Alakóldegi týrıstik klasterdi damytýda mańyzy erekshe ekenin eske saldy.
Vedomstvo basshysy Nur-Sultan qalasy men óńirlerdi joǵary jyldamdyqty 4 jolaqty avtomagıstralmen baılanystyrý jumysy jalǵasatynyn aıtady.
«Kókshetaý, Pavlodar jáne Qaraǵandy baǵytyndaǵy jumystar aıaqtaldy. Búginde qurylys jumystary Qaraǵandy qalasynan Qapshaǵaıǵa deıingi ýchaskede júrgizilýde. Jyl sońyna deıin Balqashqa deıingi ýchaske (363 shaqyrym), kelesi jyly Qapshaǵaıǵa deıingi ýchaske paıdalanýǵa berilip, Ortalyq-Ońtústik dáliziniń rekonstrýktsııasyn tolyq aıaqtalady», - dedi Beıbit Atamqulov.
Eske salsaq, Indýstrııa jáne ınfraqurylymdyq damý mınıstri atalmysh sharada aldaǵy 5 jylda qansha jol salynatyny týraly málimet bergen bolatyn.
