Elordaǵa irgeles aýyl turǵyndary sýmen qashan qamtylady

ASTANA. QazAqparat – Elorda mańyndaǵy 7 aýyldy ortalyqtandyrylǵan sýmen qamtý jumysy júrgizilip jatyr. Bul jaıynda Májilis depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Búgingi tańda 34 eldi mekenniń ishinde elordalyq aımaqqa qaraıtyn 27 eldi meken ortalyqtandyrylǵan sýmen qamtamasyz etilgen. Qalǵan 7 aýyl boıynsha ortalyqtandyrylǵan sýmen qamtamasyz etý maqsatynda jumystar júrgizilýde. Talapker jáne Qajymuqan aýyldarynda sýdy taratý jelileri salyndy. Olardy Kenjebaı jáne Rahymjansaı jer asty sýlary ken ornynan sý qubyryna qosý (magıstraldyq sý qubyryn salýdy bastaý 2023 jylǵa josparlanǵan) josparlanýda», - dep atap ótedi Úkimet basshysy jaýabynda.

Sonymen qatar, Premer-Mınıstr atalǵan eldi mekenderde halyqty sýmen jabdyqtaý sýdy tazartýdyń keshendi modýlderi arqyly júzege asyrylatyndyǵyn atap ótedi.

«2023 jyly Tselınograd aýdanynyń Taıtóbe jáne Tóńkeris aýyldarynda sýmen jabdyqtaý jobalaryn aıaqtaý jáne Shortandy aýdanynyń Klıýchı aýylynda qurylys-montaj jumystaryn bastaý josparlanǵan. Sondaı-aq, 2023 jyly Tselınograd aýdany Qyzylsýat jáne Aqqaıyń aýyldaryn sýmen jabdyqtaý boıynsha jobalaý-smetalyq qujattamany ázirleýdi aıaqtaý josparlanyp otyr», - dedi Álıhan Smaıylov.