Elordaǵa eńbek mıgranttarynyń legi artýy múmkin
ASTANA. QazAqparat - Elordaǵa eńbek mıgranttarynyń legi artýy múmkin. Bul týraly búgin Astana ákimi Á.Jaqsybekovtiń tóraǵalyǵymen ótken elorda ekonomıkasyn jaqsartý máselelerine arnalǵan jıynda qalalyq memlekettik kirister departamentiniń basshysy Ábilqaıyr Sqaqov málim etti.
«Qala eńbek mıgranttarynan túsetin bıýdjet kirisinen qaǵylýda. Jumys kúshiniń tek 25 paıyzy nemese 17 myń adamnyń ǵana resmı rásimdeletindigi jaıyndaǵy fakti bul salanyń kóleńkeli jaqtarynyń joǵary ekendigin kórsetedi. Buǵan qosa, qalǵan 75 myń adamnyń bizdiń astanamyzda jarty nemese 1 jyl qonaq bolatyndyǵyna senýdiń ózi qıyn»,- dedi ol.
Departament basshysynyń aıtýynsha, álemdik ekonomıkalyq daǵdarystyń kúsheıýi saldarynan elordaǵa, jalpy elimizge eńbek mıgranttary leginiń artýy boljanýda.
«Sondyqtan bul jumystardy qazirgi ýaqytta durys jolǵa qoıý mańyzdy. Olardy tirkeý jáne monıtorıngileýdiń jekelegen tártibin bekitý de qajet sııaqty. Bul jumystardy jáne kóshi-qon polıtsııasymen birlesken is-sharalardy durys úılestirgen jaǵdaıda resmı tirkelgen eńbek mıgranttarynyń jáne bıýdjet kirisi artýy múmkin», - dedi Á.Sqaqov.
