Elordaǵa elektrmen júretin 100 avtobýs satyp alynady
NUR-SULTAN. QazAqparat - Elordaǵa elektrmen júretin 100 jańa avtobýs satyp alynady. Bul týraly Nur-Sultan qalalyq strategııalyq jáne bıýdjettik josparlaý basqarmasy basshysynyń mindetin atqarýshy Aıjan Túgelbaeva aıtty, dep habarlaıdy QazAqparat tilshisi.
«Astana LRT jarǵylyq kapıtaly elektrmen júretin avtobýstar satyp alý úshin tolyqtyrylady. Satyp alynatyn elektrmen júretin avtobýstardyń sany - 100. Satyp alý Qazaqstan damý banki lızıngi arqyly júzege asyrylady. Bastapqy 15 paıyzdyq jarnasyn biz qamtamasyz etemiz. Odan ary qarjylandyrý men satyp alýdy avtobýs parkteri derbes júrgizedi», - dedi ol búgin Nur-Sultan qalalyq ákimdigi janyndaǵy qoǵamdyq keńes otyrysynda.
Sonymen qatar ol jolaýshylar tasymalyn sýbsıdııalaý máselesine toqtaldy.
«Áleýmettik-mańyzdy, biraq ekonomıkalyq turǵydan paıdaly emes baǵdarlardyń qyzmet etýin qamtamasyz etý maqsatynda jyldyń basynan bastap ártaraptandyrylǵan tarıftiń esebimen 2 mlrd. teńge qarastyryldy, keıin taǵy 500 mln. teńge bólindi. Qazir bıýdjettiń múmkindikterine súıene otyryp, sondaı-aq qajettiliktiń esebimen 1 mlrd. teńge bólinedi», - dedi Aıjan Túgelbaeva.
Qoǵamdyq keńes barysynda elordanyń 2019 jylǵa arnalǵan naqtylanǵan bıýdjeti talqylandy. Onda Astana LRT-ǵa qosymsha 2,9 mlrd teńge bólý qarastyrylǵan.
