Elordaǵa búgin túnde jarty aılyq mólsherdegi qar jaýdy
NUR-SULTAN. QazAqparat – Elordaǵa búgin túnde jarty aılyq mólsherdegi qar jaýdy, dep habarlaıdy QazAqparat qala ákimdiginiń saıtyna silteme jasap.
«Qazgıdromet» RMK málimetine sáıkes, 18 aqpannan 19 aqpanǵa qaraǵan túni elordaǵa jarty aılyq jaýyn-shashyn mólsheri tústi.
«Túnde 7 mm bolsa, aılyq norma 15 mm quraıdy. Aqpan aıynyń basynan beri jaýyn-shashyn mólsheri 33 mm quraıdy», delingen habarlamada.
Qalalyq Tótenshe jaǵdaı departamenti aýa raıynyń qolaısyzdyǵyna baılanysty qala turǵyndary men qonaqtaryna qaýipsizdik erejesin saqtaýdy suraıdy.
Sınoptıkterdiń málimeti boıynsha búgin boran men kóktaıǵaq kútilip, jeldiń jyldamdyǵy 23 m/s jetedi.
Eske sala ketsek, qalada aýa raıynyń qolaısyzdyǵyna baılanysty eskertý jarııalanǵan.
Qazirgi tańda departamenttiń jedel shtaby qurylyp, onyń quramyna TJD, qalanyń azamattyq qorǵaý qyzmetteriniń, aýdandyq ákimdik, «QazAvtoJol» RMK qyzmetkerleri kirdi.
Sondaı-aq qaýipsizdik maqsatynda qaladan shyǵatyn barlyq baǵyttaǵy tas joldar jabyldy. Elordalyq Tótenshe jaǵdaı departamenti turǵyndarǵa muqııat bolyp, aýa raıynyń ózgerýi týraly aqparatty jáne shekteýlerdi jiti qadaǵaýdy eskertedi.
Tótenshe jaǵdaı týyndasa, «112» qyzmeti boıynsha nemese 24-51-71, 24-51-47, 24-52-12 jedel baılanys telefon nómirleri arqyly habarlasý kerek.
Túndegi qar tazalaý jumysyna 1 292 tehnıka men 156 jol tazalaýshy jumyldyryldy.
Búgin elorda kóshelerin qardan tazartý jumysyna 1 407 tehnıka men 1 100 jol jumysshysy tartyldy.
Al jalpy osy ýaqytqa deıin barlyǵy 4 110 472 tekshe metr qar polıgondar tasyldy (325 497 reıs).
