Elordaǵa basqa qaladan kelgen zeınetker qoǵamdyq kólikte tegin júre ala ma
ASTANA. QazAqparat - Elordaǵa óńirlerden qonaqqa kelgen zeınetkerler qalalyq qoǵamdyq kólikterde tegin júre almaıdy. Óıtkeni qalalyq bıýdjetten avtobýs parkterine bólinetin qarajat tek elordada turaqty tirkelgen zeınetkerlerge ǵana eseptelingen, dep habarlaıdy QazAqparat.
Avtobýstardyń birinde jolaýshy men qoǵamdyq kólik júrgizýshisiniń arasynda daý týdy. Astanaǵa Qostanaıdan qydyryp kelgen egde jastaǵy apa zeınetker ekendigin aıtyp, jolaqysyn tóleýden bas tartsa, júrgizýshi onyń basqa qaladan kelgendigin jetkizip, jolaqy tóleýin talap etip jatty. Avtobýs salonynda adamdar da zańnyń barlyǵyna birdeı ekendigin, sondyqtan qostanaılyq zeınetkerdiń de tegin júrýi tıistigin aıtqandary boldy. Osyǵan oraı Astana qalalyq máslıhatynyń depýtaty Ramzııa Ómirbaevadan basqa qaladan kelgen zeınetkerlerdiń elordanyń qoǵamdyq kólikterde jolaqysyn tóleýge mindetti me dep suraǵan edik.
«Kez kelgen bıýdjet eń aldymen qalaǵa ǵana shaqtalyp eseptelinetindigin túsingenimiz jón. Qarjylandyrý qalada turaqty tirkeýde, Áleýmettik qorǵaý basqarmasynda esepte turǵan adamdarǵa ǵana bólinedi. Zeınetkerlerdiń qoǵamdyq kólikterde tegin júrý múkindiginen bólek te kórsetiletin kómek túrleri bar», - dedi ol.
Osy rette R.Ómirbaeva basqa qaladan kelgen zeınetkerler jaǵdaılaryn aıtyp máslıhatqa júginetin bolsa múmkinshilikke qaraı kómek kórsetýge tyrysatyndyqtaryn basa aıtty.
«Búkil Qazaqstan jaıynda aıtar bolsaq, negizinen bul másele respýblıkalyq bıýdjetke qatysty. Sondyqtan bir qaladan ekinshi qalaǵa kelgen zeınetkerlerdiń qoǵamdyq kólikterde tegin júrýi máselesi jergilikti máslıhat deńgeıinde emes, QR Parlamenti Májilisi deńgeıinde sheshilgeni jón bolar edi», - dedi máslıhat depýtaty.
