Elordaǵa azyq-túlik qajetti kólemde jetkizilýde – qala ákimdigi

NUR-SULTAN. QazAqparat – Karantın kezeńinde elordaǵa azyq-túlik turaqty jetkizilip jatyr. Bul týraly Nur-Sultan qalasy ákimdigi saýda jáne qyzmet kórsetý salasyn damytý bóliminiń jetekshisi Rýslan Ydyrysov málim etti, dep habarlaıdy QazAqparat tilshisi.

Aıta keteıik, karantın rejiminiń kúsheıtilýine baılanysty áleýmettik jelilerde elordadaǵy áleýmettik mańyzdaǵy azyq-túlik kólemine qatysty túrli pikirler taraýda.

«Búginde elorda boıynsha azyq-túlik jetkizý turǵysynda eshqandaı problema joq. Ónimder kún saıyn turaqty jetkizilýde. Ortasha alǵanda, aıyna qalaǵa 77,4 myń tonna ónim kerek. Onyń ishinde 19 áleýmettik mańyzdaǵy ónim boıynsha 39 myń tonna qamtylady. Qalada resmı túrde 80 naýbaıhana jumys istep tur, al jalpy olardyń sany 150-180 aralyǵynda. Sondyqtan nan kúndelikti dúkenderge jetkizilýde», - dedi R. Ydyrysov agenttik tilshisine.

Sonymen qatar koronavırýs ınfektsııasymen kúres boıynsha shtab qurylǵanyn, onyń quramynda qalada azyq-túlikti jetkizýge jaýapty toptar bar ekenin eske saldy.

«Monıtorıng barysynda naryqqa azyq-túlik jetkizýde eshqandaı kedergiler joq. Qala turǵyndary qajetti ónimmen tolyqtaı qamtamasyz etilgen», - dedi ol.

Osy oraıda et ónimderi de kún saıyn jetkizilip jatyr. Sonymen qatar, Aqmola jáne Qaraǵandy oblystarynan kúndelikti sút ónimderi tasymaldanýda.

R. Ydyrysovtyń aıtýynsha, kásiporyndardyń kóbisi ónimdi burynǵy deńgeıde óndirip jatyr.

«Atap aıtqanda, bul baǵytta eshqandaı kedergiler baıqalmady, sáıkesinshe, alańdaýdyń reti joq. Shtab táýlik boıy jumys istep jatyr. Atalǵan toptar azyq-túlikpen qalaǵa kirgen kólikterge turaqty monıtorıng júrgizýde», - dedi ol.

Budan buryn habarlanǵandaı, naýryz aıynyń orta kezinde Aýyl sharýashylyǵy mınıstri Saparhan Omarov qoımalardaǵy azyq-túlik qory týraly aıtyp berdi.