Elordaǵa Astana ataýyn qaıtarý: Tıisti sheshim zań ústemdigi aıasynda júzege asady

«Parlamenttegi depýtattar toby elordanyń burynǵy Astana ataýyn qaıtarý týraly usynys bildirgeni málim. Depýtattardyń bul bastamasynan Prezıdent habardar. Halyq qalaýlylary, óz kezeginde turǵyndarmen kezdesýlerde aıtylǵan usynystarǵa, sondaı-aq referendým kezinde azamattardyń kóptegen ótinishterine súıendi. Májilis depýtattarynyń usynysy Memleket basshysynyń kelisimimen Konstıtýtsııalyq zań jobasyna engizildi», - dep jazdy QR Prezıdentiniń baspasóz hatshysy Rýslan Jeldibaı Facebook-tegi paraqshasynda.

Bul turǵyda Tuńǵysh Prezıdent atyndaǵy basqa da nysandar óz ataýlaryn saqtap qalady.

«Prezıdent Qazaqstannyń qazirgi memlekettiligin nyǵaıtýda jáne elordanyń irgesin qalaýda N.Á. Nazarbaevtyń sheshýshi ról atqarǵany tarıhı fakt dep sanaıdy. Sondyqtan Tuńǵysh Prezıdent atyndaǵy basqa da nysandar óz ataýlaryn saqtap qalýy tıis», - dedi Memleket basshysynyń baspasóz hatshysy.

Atap aıtqanda, ótken aptada bul taqyryp tóńireginde Parlament Májilisiniń tóraǵasy Erlan Qoshanov pikir bildirgen edi.

«Elordanyń ataýyn ózgertý máselesine toqtalsaq, bul bastama bizdiń depýtattardyń, depýtattyq toptyń usynysy bolyp otyr. Birneshe jyl buryn elordanyń ataýyn ózgertkennen bastap qoǵamnyń ishinde pikirtalas áli de tolastamady. Sondyqtan halyq arasynda túrli pikir bar. Sonyń kóbisi burynǵy ataýyn qaıtarýǵa qatysty», - dedi E.Qoshanov.

Osy oraıda ol depýtattar halyq únine qulaq asýy qajet degen paıymmen elordanyń burynǵy ataýyn qaıtarý máselesin kótergenin aıtty.

Senat tóraǵasy Máýlen Áshimbaev elordaǵa Astana ataýyn qaıtarý máselesinde halyqtyń pikirine mán berý kerek ekenin aıtyp otyr.

«Bul máselede adamdar óz pikirin aıtýǵa quqyly. Azamattyń óz pikirin aıtýǵa múmkindigi bolýy kerek, ıaǵnı bul turǵyda qýdalaıtyndaı saıasat joq. Eń bastysy, halyqtyń pikirin eskerýimiz kerek. Halyqtyń, qala turǵyndarynyń pikiri – negizgi faktor. Osy oraıda jarııalanyp júrgen usynystardy estip, Májilistiń depýtattary tıisti bastamany kóterip jatyr. Bul turǵyda halyq ne aıtsa, sol bolýy kerek. Halyq qoldasa, osyndaı sheshimderge barýymyz tıis», - dedi M. Áshimbaev.

Senat tóraǵasy bul máselede eshqandaı saıası oıyndar joq ekenin, ıaǵnı Qazaqstan halqynyń pikirine nazar aýdarýǵa mán berilgenin aıtty.

«Jańa Qazaqstannyń aıasynda «halyq únine qulaq asatyn memleket» baǵdarlamasyn júzege asyryp jatyrmyz. Bul rette qoǵamdaǵy oılardy pysyqtap, tıisti sheshim qabyldanady», - dedi ol.

Astana ataýyn qaıtarýǵa qosymsha shyǵyndar bolmaıdy

QR Qarjy mınıstrligi Memlekettik organdar bıýdjet departamentiniń dırektory Svetlana Kýcherova elordaǵa Astana ataýyn qaıtarýǵa qatysty qosymsha shyǵyndar bolmaıtynyn alǵa tartyp otyr.

«Elordanyń ataýyn ózgertýge toqtalsaq, ortalyq memlekettik organdarda ǵımarat mańdaıshasyndaǵy jazýlar aýystyrylady. Bul jumystar jyl saıyn ǵımarattardy kútip ustaýǵa bólinetin qarajat esebinen júzege asyrylady. Sonymen qatar, blanki ónimderin ózgertý qajet bolady. Atap aıtqanda, memlekettik organdarda elektrondyq qujat aınalym bar ekenin eskersek, blankilerdi basyp shyǵarýǵa qomaqty qarajat kerek bolmaıdy», - dedi departament basshysy.

Onyń aıtýynsha, bul shyǵyndardy buǵan deıin qarastyrylǵan qarajat somasynda iske asyrýǵa bolady.

«Elorda ataýy jazylǵan normatıvtik-quqyqtyq qujattarǵa ózgeris engizý qosymsha shyǵyndardy qajet etpeıdi», - dedi Svetlana Kýcherova.

QR Prezıdenti janyndaǵy QSZI jetekshi ǵylymı qyzmetkeri Darına Danenovanyń sózine qaraǵanda, álemdik tájirıbede belgili bir tarıhı oqıǵanyń yqpalymen qala ataýyn ózgertken jaǵdaılar kóp kezdesedi.

«Keıde qalanyń bastapqy ataýy ózgergennen keıin, qaıta burynǵy ataýy qoıylǵan jaǵdaılar da bolǵan. Qala ataýyn ózgertýdi qoǵamnyń rýhanı jańǵyrýymen qatar júretin ǵuryptyq áreket retinde qarastyrýǵa bolady. Qazirgi ýaqytta Qazaqstannyń elordasyna burynǵy ataýy Astanany qaıtarý týraly máseleniń kóterilýi kezdeısoq emes shyǵar?! Buǵan dálel retinde kóptegen áleýmettaný salasyndaǵy saýalnamalardyń nátıjesin keltirýge bolady. Qazirgi tańda túrli ınternet-resýrstarda «Astana ataýynyń qaıtarylýyn qoldaısyz ba?» degen suraq jarııalanyp, saýalnamaǵa qatysqandardyń 70-85 paıyzy «ıá» dep jaýap bergen. Mundaı saýalnamany reprezentatıvti dep sanaýǵa bolmaıdy, degenmen jaýaptardaǵy úrdis aıqyn», - dedi sarapshy.

D. Danenovanyń sózine qaraǵanda, 2019 jyldan bastap qazirgi deıin Astana ataýymen atalǵan «Astana Opera», «Astana Balet», «Astana Arena», sport klýbtary, telearna, áýe kompanııasy sııaqty elordanyń negizgi nysandary burynǵy ataýlaryn saqtap qaldy.

«Sondyqtan astanalyqtardyń Astanada turýy, al buǵan deıin tanymal bolǵan jáne eshkim umyta qoımaǵan Astana brendiniń halyqaralyq arenaǵa qaıta oralýy zańdy bolmaq!», - dedi ol.

Elorda ataýyn ózgertýge qatysty óner adamdary men sportshylar da óz pikirlerin bildirip jatyr.

Qazaqstandyq estrada ánshisi Lakı Kesoglýdyń paıymynsha, Astana – bul qulaqqa jaǵymdy estiletin óte yqshamdy ataý.

«Durys sheshim qabyldandy. Astanaǵa burynǵy ataýyn qaıtarý kerek dep esepteımin. Astana - elorda dep aýdarylady. Bul qulaqqa jaǵymdy estiletin óte yqshamdy ataý. Ol barlyǵynyń qulaǵynda jattalǵan. Bul da mańyzdy ról atqarady», - dedi Lakı Kesoglý.

Óz kezeginde tanymal boksshy, Olımpıada chempıony Baqtııar Artaev Astana ataýy brend retinde qalyptasqanyn aıtty.

«Jalpy Astana – bizdiń elimizdiń ordasy ekenin aıǵaqtap tur. Sonymen qatar, ol brend bolyp qalyptasty. Bul ataý halyqtyń sanasyna sińdi, oıynda qaldy», - dedi boksshy.

Sonymen qatar, belgili qazaqstandyq akter, rejısser jáne prodıýser Sanjar Mádı depýtattardyń Astana ataýyn elordaǵa qaıtarý týraly usynysyn qoldaıtynyn jetkizdi.

«Bul usynysty men de qoldaımyn, elordaǵa bastapqy ataýdy qaıtarý týraly sheshim durys dep esepteımin. Astana degen jaqsy ataý», – deıdi S. Mádı.