Elordaǵa Astana ataýyn qaıtarý máselesinde halyqtyń pikirine mán berý kerek – Máýlen Áshimbaev

NUR-SULTAN. QazAqparat – Senat tóraǵasy Máýlen Áshimbaev elordaǵa Astana ataýyn qaıtarýǵa qatysty pikir bildirdi, dep habarlaıdy QazAqparat tilshisi.

«Bul máselede adamdar óz pikirin aıtýǵa quqyly. Azamattyń óz pikirin aıtýǵa múmkindigi bolýy kerek, ıaǵnı bul turǵyda qýdalaıtyndaı saıasat joq. Eń bastysy, halyqtyń pikirin eskerýimiz kerek. Halyqtyń, qala turǵyndarynyń pikiri – negizgi faktor. Osy oraıda jarııalanyp júrgen usynystardy estip, Májilistiń depýtattary tıisti bastamany kóterip jatyr. Bul turǵyda halyq ne aıtsa, sol bolýy kerek. Halyq qoldasa, osyndaı sheshimderge barýymyz tıis», - dedi M. Áshimbaev Senattyń jalpy otyrysynan keıin tilshiler saýalyna jaýap bere otyryp.

Senat tóraǵasy bul máselede eshqandaı saıası oıyndar joq ekenin, ıaǵnı Qazaqstan halqynyń pikirine nazar aýdarýǵa mán berilgenin aıtty.

«Jańa Qazaqstannyń aıasynda «halyq únine qulaq asatyn memleket» baǵdarlamasyn júzege asyryp jatyrmyz. Bul rette qoǵamdaǵy oılardy pysyqtap, tıisti sheshim qabyldanady. Astanaǵa qatysty sheshim áli de qabyldanǵan joq. Osy másele boıynsha talqylaý protsesi júrip jatyr. Májilis depýtattarynyń bastamasyn jan-jaqty qarap, talqylaýymyz kerek», - dedi ol.

Budan buryn habarlanǵandaı, Parlament Májilisiniń tóraǵasy Erlan Qoshanov elordaǵa Astana ataýyn qaıtarý usynysyna qatysty pikir bildirdi.