Elordaǵa Arys qalasynan 200 bala keldi

NUR-SULTAN. QazAqparat - Búgin tańerteń Arys qalasynan 200 bala Nur-Sultan qalasyna keldi. Olar endi 10 kún boıy bas qalamyzda demalatyn bolady, dep habarlaıdy Elorda Info.

Bes vagon bolyp kelgen balalardy Nur-Sultan qalasynyń ákimi Altaı Kólginov saltanatty jaǵdaıda qarsy aldy.

«Nur-Sultan qalasyna qosh keldińizder, balalar! Aman-esen jetkenderińe qýanyshtymyz. Endi sizder osynda on kúndeı demalatyn bolasyńdar. Elordamyzdyń kórikti jerlerin aralap, kontserttik-sporttyq sharalarǵa qatysasyzdar. Senderden keıin ózderińmen oqıtyn basqa balalar da keletin bolady. Nur-Sultan qalasy Aryspen birgemiz!» - dedi elorda ákimi.

Sonymen qatar qala basshysy arystyq búldirshinderge ózimen birge qarsy alý rásimine kelgen Erjan Maksımdi de tanystyrdy.

Arystan kelgen oqýshylar «Balalar úıi» men Gýmanıtarlyq kolledjde turatyn bolady.

«Bizdi vokzalda qarsy alǵanda qala ákimi «Nur-Sultan qalasyna birinshi ret kelgenderiń bar ma, bolsa qoldaryńdy kóterińdershi» degeninde eki qolymdy birdeı kóterip jiberippin. Elordanyń adamdary jaqsy eken, orkestrmen qarsy aldy. Men óte qýanyshtymyn. Endi Arystaǵy úıimiz jóndelgenshe osynda bolamyz. Jatatyn ornymyz da unaıdy», - deıdi Arys qalasyndaǵy S.Adambekov atyndaǵy orta mekteptiń 6-synyp oqýshysy Mereı Naǵanaı.

Arys oqýshylaryn bastap kelgen Túrkistan oblystyq Bilim basqarmasynyń mamany Qurmanǵazy Dinaq ta barlyǵy kóńilinen shyqqanyn bildirdi.

«Óte qýanyshtymyz. Balalardy jaqsy qarsy alǵan qala basshylyǵyna, jurtshylyqqa rızashylyǵym sheksiz. Eldigimiz kórinip, birligimiz bilinip jatyr», - deıdi ol.