Elordaǵa álemniń úzdik sýretshileri jınalady
«Astana Art show 2019 festıvali osymen ekinshi jyl qatarynan uıymdastyrylǵaly otyr. Byltyr alǵash ótken festıvaldi 40 myńǵa jýyq adam tamashalaǵan bolatyn. Bıyl onyń formatyn ózgertip, kórme shoýy túrinde ótkizý qolǵa alyndy. Osy turǵyda bıylǵy festıvalge qatysýshylar men ony tamashalaýshylardyń sany arta túsedi degen oıdamyz. Qalalyq ákimdik óz kezeginde aıtýly sharany uıymdastyrýshy rólin atqarady», - dedi Nur-Sultan qalasy Mádenıet jáne sport basqarmasy basshysynyń orynbasary Narıma Muhambetalına festıvaldi uıymdastyrýǵa arnalǵan baspasóz máslıhatynda.
Onyń sózine qaraǵanda, festıval aıasynda kórkemdik ekspozıtsııalar kórmesi, tegin sheberlik synyptary, vorkshop, dárister, otbasylyq serýender jáne taǵy basqa sharalar uıymdastyrylady.
«Festıval eki kezeńnen turady «Birinshi baılanys» jastar kórmesi jáne «Racing the Galaxy» halyqaralyq sýretshiler kórmesi. Alǵashqysy 2 maýsymda bastalyp, 10 tamyzǵa deıin jalǵasady. Onda 22 qazaqstandyq sýretshiniń art-rezıdentsııa aıasynda jasalǵan jumystary kórsetiledi. Ekinshi «Racing the Galaxy» halyqaralyq kórmesinde belgili qazaqstandyq jáne sheteldik sýretshilerdiń shyǵarmalary usynylady. Olardyń qatarynda Mıkelandjelo Pıstoletto (Italııa), Leandro Erlıh (Argentına), Djoıl Adrıanomıarsea (Madagaskar), Mental Klınık (Túrkııa), Ashat Ahmedıarov (Qazaqstan) jáne taǵy basqalar bar. Joba álemge áıgili frantsýz kýratory jáne halyqaralyq deńgeıdegi kórkemdik kórmeler jetekshisi Jerom Sanstyń basshylyǵymen uıymdastyrylady. Kórme qala kúni qarsańynda 4 shildede ashylyp, 10 tamyzǵa deıin jalǵasady», - dedi ol.
Uıymdastyrýshylardyń málimetinshe, Astana Art show 2019 zamanaýı art-ónerdiń jáne mádenı áralýandyqtyń kókjıegin keńeıtedi. Jáne bıylǵy festıval nomadızm men erkindik rýhy uranymen ótedi.
Elordadaǵy Táýelsizdik, Beıbitshilik jáne kelisim saraıynda ótetin mádenı sharany qala turǵyndary men qonaqtary tegin tamashalaı alady.
