Elordaǵa álemdik deńgeıdegi teatr ujymdary kele jatyr
Búgin Mádenıet jáne sport mınıstrliginiń baspasóz ortalyǵynda ІІ Dúnıejúzilik «Astana» teatr festıvaliniń ótkizilýi boıynsha baspasóz máslıhaty ótti. Sharaǵa Qazaqstan teatrlary qaýymdastyǵynyń prezıdenti, «Qazaqstannyń Eńbek Eri» Asanáli Áshimov, «Qazaqkontsert» MKU dırektory Jeńis Seıdýllauly, Qazaqstan teatrlary qaýymdastyǵynyń vıtse-prezıdenti, M.Áýezov atyndaǵy Qazaq memlekettik akademııalyq drama teatrynyń dırektory Ashat Maemırov, QR eńbek sińirgen qaıratkeri «Qurmet» jáne «Parasat» ordenderiniń ıegeri, belgili teatr jáne kıno aktrısasy Merýert Ótekesheva qatysty.
Jeńis Seıdýllaulynyń aıtýynsha, ІІ Dúnıejúzilik «Astana» teatr festıvali óte aýqymdy mádenı is-shara. Sebebi Astananyń 20 jyldyǵy men «Rýhanı jańǵyrý» baǵdarlamasy aıasynda teatr festıvali elordalyqtar men qala qonaqtarynyń úzdik teatr qoıylymdarymen tanysýyna múmkindik beredi. Dúnıejúzilik mega jobanyń uıymdastyrýshylary - QR Mádenıet jáne sport mınıstrliginiń qoldaýymen «Qazaqkontsert» memlekettik kontserttik uıymy. ІІ Dúnıejúzilik teatr festıvaliniń shymyldyǵy 16 maýsym kúni «Qazaqstan» ortalyq kontsert zalynda ashylady.
Óz kezeginde Ashat Maemırov festıval aıasynda qandaı teatr ujymdary óner kórsetetinin málim etti.
«Óziniń úzdik qoıylymdaryn aıtýly qazaqstandyq óner ujymdary - M.Áýezov atyndaǵy Qazaq memlekettik akademııalyq drama teatry, Q.Qýanyshbaev atyndaǵy akademııalyq qazaq mýzykalyq-drama teatry, «Astana mıýzıkl» teatry, Ǵ.Músirepov atyndaǵy Qazaq memlekettik akademııalyq balalar men jasóspirimder teatry usynady. ІІ Dúnıejúzilik «Astana» teatr festıvalinde kelesi álemdik teatr ujymdary bas qospaq: «Piccolo Teatro di Milano» (Italııa), «1927» (Ulybrıtanııa), «Meno Fortas» (Lıtva), «TRWarszawa» (Polsha), Sh.Rýstavelı atyndaǵy Grýzııa memlekettik akademııalyq teatry (Grýzııa), «Beijing People's Art Theatre» (Qytaı), «Nakamura Gekijo» (Japonııa), Ózbek ulttyq akademııalyq drama teatry (Ózbekstan), «Máskeý gýbernııalyq teatr», Lensovet atyndaǵy Sankt-Peterbýrg akademııalyq teatry (Reseı)», - dedi ol óz sózinde.
Sonymen birge festıval sheńberinde belgili frantsýzdyq kıno jáne teatr aktrısasy, Oskar syılyǵynyń, Kann kınofestıvaliniń «Altyn palma butaǵy» júldesiniń, Berlın, Venetsııa kınofestıvalderi syılyǵynyń ıegeri Jıýlet Bınoshtyń ónerin, sheberlik synyptaryn tamashalaý sáti túsedi.
Al Qazaqstan teatrlary qaýymdastyǵynyń prezıdenti Asanáli Áshimovtyń aıtýynsha, festıvalge Alekseı Bortoshevıch (Reseı), Ionas Vaıtkýs (Lıtva), Davıd Asatıanı (Frantsııa), Beatrıs Pıkon-Vallen (Frantsııa), Esıhıro Nakamýra (Japonııa), Davıd Papava (Ulybrıtanııa) syndy Eýropa men Azııanyń belgili teatr synshylary men dramatýrgteri qatysady.
Uıymdastyrýshylar spektaklderdiń «Qazaqstan» ortalyq kontsert zaly, «Energııa holy», Beıbitshilik jáne Kelisim saraıy, M.Gorkıı atyndaǵy Memlekettik akademııalyq orys drama teatry jáne Q.Qýanyshbaev atyndaǵy Qazaq mýzykalyq drama teatry sahnalarynda qoıylatynyn jetkizdi.
