Elordaǵa 3 aıda 1,7 mlrd dollar shetel ınvestıtsııasy tartyldy
ASTANA. KAZINFORM — 2026 jyldyń 1-toqsanynda elordaǵa 1,7 mlrd dollar kóleminde tikeleı shetel ınvestıtsııasy tartyldy. Bul týraly Astana qalalyq ınvestıtsııalar jáne kásipkerlikti damytý basqarmasy basshysynyń orynbasary Nurjan Áshimov aıtty.
— Astana ınvestıtsııalyq belsendiliktiń turaqty qarqynyn saqtap keledi. Osy jyldyń 7 aıynda negizgi kapıtalǵa salynǵan ınvestıtsııa kólemi 1 trln 294 mlrd teńge boldy. Bul ótken jyldyń sáıkes kezeńimen salystyrǵanda 2,7 paıyzǵa kóp. Sonymen qatar, ınvestıtsııalardyń negizgi bóligin jeke ınvestıtsııalar quraıtynyn atap ótken jón. Olardyń úlesi shamamen 70 paıyzdy nemese 927 mlrd teńge. Bul kórsetkish qalamyzda qolaıly ınvestıtsııalyq ahýal qalyptasqanyn jáne bıznestiń elordadaǵy jobalarǵa qyzyǵýshylyǵy joǵary ekenin kórsetedi. Sheteldik ınvestıtsııalardy tartý boıynsha da oń dınamıka baıqalady. Tek osy jyldyń birinshi toqsanynda tikeleı sheteldik ınvestıtsııalardyń kólemi 1,7 mlrd AQSh dollary. Bul ótken jyldyń sáıkes kezeńimen salystyrǵanda 17,6 paıyzǵa joǵary, — dedi Nurjan Áshimov elordanyń kommýnıkatsııalar qyzmetinde ótken brıfıngte.
Onyń aıtýynsha, qazirgi ýaqytta barlyq jeke ınvestıtsııalyq bıznes-joba boıynsha monıtorıng Ulttyq tsıfrlyq ınvestıtsııalyq platforma arqyly júrgiziledi.
— Astana qalasy boıynsha jalpy quny 2,2 trln teńge bolatyn jáne 28 myń jumys ornyn ashýdy kózdeıtin 220 iri ınvestıtsııalyq joba bar. Bul jobalar ónerkásip, logıstıka, bilim berý, densaýlyq saqtaý, týrızm jáne sport sııaqty túrli salalardy qamtıdy. Bıyl paıdalanýǵa berý josparlanǵan jalpy quny 200 mlrd teńge bolatyn 29 jobanyń búgingi kúnge deıin 15-i iske qosyldy. Jyl sońyna deıin qalǵan 14 jobany júzege asyrý josparlanyp otyr, — dedi ol.
Buǵan deıin Astanada bıyl shtat qysqartylýyna baılanysty qansha adam jumyssyz qalǵanyn jazǵan edik.
