Elordadan jańa halyqaralyq áýe reısteri ashylady - Roman Sklıar
NUR-SULTAN. QazAqparat - Bıyl jáne kelesi jyly Nur-Sultan qalasynan halyqaralyq baǵytta jańa áýe reısteri ashylatyn bolady. Bul týraly QR Indýstrııa jáne ınfraqurylymdyq damý mınıstri Roman Sklıar málim etti, dep habarlaıdy QazAqparat tilshisi.
«Osydan jarty jyl buryn Elbasy Nursultan Nazarbaev halyqqa qoljetimdi áýe kompanııasyn ashý kerektigi jóninde tapsyrma berdi. Mine, búgin bárimiz loýkosterdiń alǵashqy reısiniń sátti oryndalýyna, ıaǵnı tarıhı sátke kýá bolyp otyrmyz. Statıstıka kórsetip otyrǵandaı, jyl sanap avıajolaýshylardyń sany artyp keledi. Buǵan dálel - ótken jyly elimizde 8 mln jolaýshy áýe qatynasy arqyly tasymaldandy, bul 2017 jylmen salystyrǵanda 6 esege artyq. Al 2010 jyldan bergi 9 jyldyń ishinde áýe qatynasynyń jolaýshylary 40 ese kóbeıgen. Sondaı-aq, Astana halyqaralyq qarjy ortalyǵynyń qoljetimdiligin arttyrý maqsatynda jańadan halyqaralyq áýe reısteri ashylady. Bul is osy jylǵa jáne kelesi jylǵa josparlanyp otyr», - dedi R.Sklıar.
Onyń aıtýynsha, halyqaralyq áýe reısteriniń de sany artqan. Qazirgi ýaqytta Qazaqstannan álemniń 27 eline 97 baǵytta halyqaralyq reıs jasalady.
«Búgingi kúni halyqaralyq tájirıbe kórsetip otyrǵandaı, loýkosterler neǵurlym belsendi damyp jatyr. Olar avıajolaýshylar úshin qoljetimdi bolǵandyqtan basymdyqqa ıe jáne óziniń ósý qarqyny boıynsha klassıkalyq avıakompanııalardy basyp ozady. Qazaqstannyń bul protsesterden tysqary qalýyna bolmaıdy, sondyqtan jańadan qurylǵan tómen bıýdjetti FlyArystan tasymaldaýshysy týrıstik jáne iskerlik belsendilik esebinen halyqtyń utqyrlyǵyn arttyrýǵa múmkindik beredi», - deıdi mınıstr.
Buǵan deıin habarlaǵanymyzdaı, búgin «FlyArystan» bıýdjettik avıakompanııanyń alǵashqy áýe reısi Almatydan elordaǵa ushyp keldi. Onyń bortynda 180 avıajolaýshy jáne 4 bortseriktesi boldy.
