Elordadan úsh shaqyrym jerde tabylǵan jasandy sý aıdynynda shomylýǵa bolmaıdy
NUR-SULTAN. QazAqparat – Elordadan úsh shaqyrym jerde tabylǵan jasandy sý aıdynynda shomylýǵa bolmaıdy. Bul jaıynda QR Ekologııa, geologııa jáne tabıǵı resýrstar mınıstrliginiń baspasóz hatshysy Samal Ibraeva Facebook-tegi paraqshasynda jazdy, dep habarlaıdy QazAqparat tilshisi.
Jasandy sý aıdyny Nur-Sultan qalasynan 3 shaqyrym qashyqtyqta, «Nur-Sultan-Kókshetaý» aınalma jolynda ornalasqan.
Nur-Sultan qalasynyń ekologııa departamentiniń mamandary sý aıdynyna qyrkúıektiń 4-i baryp qaıtqan. Departamenttiń zerthanalyq-saraptamalyq baqylaý bólimi synama alyp, nátıjesinde otteginiń hımııalyq shyǵynynyń (OHSh) kóp mólsherde bary anyqtalǵan.
«Bul jerde tereńdigi shamamen 5-6 metrdi quraıtyn qaraýsyz jatqan karer ornalasqan. Sýdyń tereńdigi shamamen 1,5-2 metr. Munda balyq pen basqa tirshilik ıeleriniń turaqty tirshilik etýi múmkin emes. Sebebi bul jerde mıneraldar men saz-balshyq tym kóp.
«Joǵaryda atalǵan faktorlardyń sebebinen rezervýar faýna úshin jaramsyz», - deıdi Nur-Sultan qalasynyń bas memlekettik ekologııalyq ınspektory Janbolat Qaıranbekov.
Karer 2013 jyldan bastap jumys istemeıdi. Jasandy sý aıdynynyń paıda bolýy da sondyqtan. Jasandy karerden 3 shaqyrym radıýsta óndiristik jáne turǵyn úı nysandary joq. Sılıkat kirpishtiń qaldyqtary da tabylmady. Aǵyndy sýlar rezervýarǵa tógilmeıdi. Alaıda qurylys qoqystaryn ruqsatsyz tastaý derekteri anyqtaldy.
«Kaolın kareri kaolın degen aq sazdyń erekshe túrin óndirý úshin qurylǵan. Bul sý aıdynynda shomylýǵa bolmaıdy. Óıtkeni munda óndirilgen kaolın óte ýly ári adam densaýlyǵyna qaýipti. Sondaı-aq sý aıdynynda adamnyń aıaǵyn tartyp áketetin saz-balshyq ta qaýip týdyrady. Al sýǵa kógildir tús beretin zat - monmorıllonıt (nontronıt). Sýda bul saz erimeıdi, biraq ol sýdy boıaıtyn juqa júzinniń paıda bolýyna sep bolady. Jasandy sý aıdyny jerasty sýmen shaıylady. Ondaǵy sýdyń únemi kógildir bolatynyn da sondyqtan», - dedi Samal Ibraeva.
