Elordadan Túrkistanǵa jumysqa kelgen qurylysshy koronavırýstan kóz jumdy

TÚRKІSTAN. QazAqparat – Shymkent qalasynda koronavırýs indetinen bir naýqas kóz jumdy. 41 jastaǵy azamat Nur-Sultan qalasynan kelip, Túrkistan oblysynda qurylys kompanııasynda jumys istegen, dep habarlaıdy QazAqparat tilshisi.

Qalalyq tótenshe jaǵdaılar shtabynyń málimetinshe, marqum 15 maýsym kúni densaýlyǵynyń aýyrlaýyna baılanysty emdeý mekemesine kelgen. Shymkent qalasyndaǵy «Avıtsenna» medıtsına ortalyǵynda PTR dıagnostıkalyq zertteý boıynsha COVID-19 analız tapsyrǵan. Naýqastan alynǵan saraptamasynyń qortyndysy oń nátıje kórsetken soń, 16 maýsym kúni jedel járdem qyzmeti arqyly juqpaly aýrýlar aýrýhanasyna jetkizilgen. Jaǵdaıynyń aýyrlyǵyna baılanysty birden jansaqtaý bólimine jatqyzylǵan.

«Aýrýhanaǵa túsken kezinde naýqastyń jaǵdaıy aýyr bolǵandyqtan IVL apparatyna qosylǵan. Emdeý hattamalaryna sáıkes naýqasqa barlyq qajetti emdeý is-sharalary júrgizilip, birneshe ret respýblıkalyq mamandarmen konsýltatsııalar ótkizilgen. Júrgizilgen reanımatsııalyq sharalarǵa qaramastan, naýqas 17 maýsym kúni tańǵy saǵat 05:40 ótkende qaıtys boldy» delingen habarlamada.