Elordadan Túrkistanǵa 10 kúndik marafon-báıge bastaldy - Jeńimpazdar 30 mıllıon teńge alady
NUR-SULTAN. QazAqparat – Elimizde «Uly dala joryǵy» tuńǵysh jalpyrespýblıkalyq at marafony bastaldy. Shabandozdar elorda men Aqmola, Qaraǵandy, Ulytaý, Qyzylorda, Túrkistan oblystarynda 1200 shaqyrymdy júrip ótedi, dep habarlaıdy QazAqparat tilshisi.
Marafonshylar 18 qyrkúıeginde Táýelsiz Qazaqstannyń astanasy – Nur-Sultan qalasynan attanyp, 29 qyrkúıekte Túrki áleminiń rýhanı astanasy – Túrkistan qalasyna at basyn tireýi tıis. Qatysýshylarǵa túrkilerdiń kıeli jerleri – Joshy han, Alasha han keseneleri, sondaı-aq Qazaq handyǵynyń alǵashqy astanasy Sozaq qalasy pen túrki rýhanııatynyń besigi Túrkistan qalasy sııaqty tarıhı oryndarǵa, Áziret-Sultan kesenesine zııarat jasaýǵa múmkindik týady.
«Alǵash ret «Uly dala joryǵy» marafon-báıgesi bastalyp otyr. Bul elimizdiń mádenı ómirindegi erekshe oqıǵa. Qazir Prezıdentimizdiń bastamasymen elimizde eleýli, aýqymdy ózgerister bolyp jatyr. Biz Ádiletti Qazaqstanǵa bastaıtyn joldyń bastaýynda turmyz. Búgingi joryqtyń osyndaı tarıhı kezeńmen tuspa-tus kelýiniń úlken sımvolıkalyq máni bar dep esepteımin. Búgingi báıgeni uıymdastyrýshylardyń biri – Amanat partııasy. Sol Amanat partııasy atynan barshańyzǵa sáttilik tileımin. Bizdiń ulan-ǵaıyr jerimiz bar, sol keń-baıtaq jerdi kesip ótý – jigittiń jigitiniń ǵana qolynan keledi jáne attyń aty ǵana shydaıtyn uzaq jol. Sondyqtan joryqqanda joldaryńyz bolsyn! Qasıetti kıeli Túrkistan shaharynda aman-saý kezdeseıik», - dedi Parlament Májilisiniń tóraǵasy Erlan Qoshanov marafonnyń ashylý saltanatynda.
Marafon-báıgege Qazaqstannyń barlyq óńirinen 20 komanda qatysady. Onyń quramynda kásipqoı shabandozdar da, áýesqoılar da bolýy múmkin.Ár komanda quramynda 5 shabandoz (kapıtan, veterınar, eki atbegi jáne marshrýtqa jaýapty adam) jáne 10 jylqy bar (ár shabandoz 1 ret at aýystyra alady).
«Qurmetti halaıyq! Búgin barshamyz Uly dalamyzdy dúbirge bóleıtin aıtýly alamannyń kýási bolaıyn dep turmyz. Joryqqa tas-túıin daıyn jigitterge aıtarymyz, sender búgin tulpar tuıaǵymen jańa tarıhty jazaıyn dep tursyńdar. «Uly dala joryǵy» jaı ǵana marafon emes, bul – namystyń dodasy, tózim men jiger, qaırat pen minez synǵa túsetin alaman. 1200 shaqyrymǵa tózip beretin taqym, tótep beretin tulpar joq degen pikirler aıtyldy. Biraq, batyr babalarymyz Altaıdan Anadolyǵa deıingi aralyqty at ústinde júrip jaýlady. Sender búgin sol bahadúr babalardyń dańqty muragerleri retinde osy dodada atqa qonyp tursyńdar. Sanany jańǵyrtatyn, rýhty oıatatyn «Uly dala joryǵyna» barshamyz jankúıermiz», - dedi QR Mádenıet jáne sport mınıstri Dáýren Abaev.
Ár kezeńniń uzyndyǵy – 100 shaqyrym jáne onda sóre, baqylaý beketi, máre belgilengen. Tutas qashyqtyqty bastan-aıaq eń az ýaqytta júrip ótken komanda marafonnyń jeńimpazy dep tanylady. Jeńimpazdarǵa aqshalaı syılyqtar men «Uly Dala Sarbazy» ataǵy beriledi.
1-oryn úshin júlde qory – 30 000 000 teńge men Kýbok bolsa, 2-orynǵa – 20 000 000 teńge men Kýbok jáne 3-oryn úshin – 15 000 000 teńge men Kýbok ázirlengen. Júlde qory komanda Túrkistan qalasyndaǵy márege tolyq qurammen (5 adam) jetken jaǵdaıda ǵana tolyq tólenedi.
Buǵan deıin Májilis tóraǵasy Erlan Qoshanov Memleket basshysy Qasym-Jomart Toqaevtyń alamanshylardy quttyqtaý hatyn oqyp bergen edi.
