Elordadan SQO-ǵa gýmanıtarlyq kómek jetti
PETROPAVL. QazAqparat - Soltústik Qazaqstan oblysyna Astanadan sý tasqynynan zardap shekkender úshin gýmanıtarlyq júk keldi, dep habarlaıdy «QazAqparat» HAA tilshisi óńirlik ortalyq kommýnıkatsııalar qyzmetine silteme jasap.
Petropavlda salmaǵy 2,5 tonna bolatyn júk kóligin №12 orta mektepte ornalasqan evakýatsııalyq bekette kútip aldy.
Bul beket 40 adamǵa laıyqtalǵan, onda sý tasqynynan zardap shekken 7 adam turyp jatyr. Munda úsh mezgil tamaqtaný, jylý, medıtsınalyq kómek sııaqty ýaqytsha ómir súrýge qajettiniń barlyǵy bar. Astana qalasynyń turǵyndary jınaǵan gýmanıtarlyq kómek SQO-daǵy sý tasqynynan zardap shekken eldi mekenderdiń turǵyndaryna úlestiriledi.
«17 sáýr kúni Ǵalym Báıtik zardap shekkenderge kómek jınaý týraly #tasqynkómek heshtegin jarııalady. Kómek jınalatyn oryn óńirlik damý ortalyǵynyń shtab-keńsesinde ornalasty. Bul sharaǵa «Samuryq-Qazyna» qory men «Qazaqstan temir joly» sııaqty kásiporyndar men jekelegen azamattar atsalysty. Osy kezeńde 6 tonna kómek jınalǵan. Kómek sonymen qatar Aqmola jáne Qaraǵandy oblystaryna da jóneltildi»,-dep habarlady óńirlik kommýnıkatsııalar qyzmetinen.
Sý tasqynanan zardap shekenderge gýmanıtarlyq kómekti soltústikqazaqstandyq uıymdar men oblys turǵyndary da jınaýda. Petropavl qalasyndaǵy Ǵ.Músirepov aýdanynda kómek jınaý beketteri ashylǵan.
