Elordadan Shymkentke bara jatqan avtobýstaǵy 37 jolaýshy jolda qalyp qoıdy
QYZYLORDA. QazAqparat - Búgin qyzylordalyq qutqarýshylar «Qyzylorda-Jezqazǵan» jolynyń boıynda kún sýyqta buzylyp qalǵan avtobýstyń 37 jolaýshysyna qol ushyn sozdy, dep habarlaıdy QazAqparat tilshisi.
Oblystyq tótenshe jaǵdaılar departamentiniń kezekshi bólimine saǵat 15.22-de habar kelip tústi. Onda «Qyzylorda-Jezqazǵan» jolynyń 135 shaqyrymynda «Setra» jolaýshylar avtobýsy buzylyp qalǵany aıtylǵan.
Oqıǵa ornyna tótenshe jaǵdaılar salasy mamandary jedel jetti. Avtobýsta barlyǵy 37 jolaýshy bar ekeni anyqtaldy.
Jolaýshylar kóliginiń Nur-Sultan qalasynan Shymkentke bet alǵany belgili boldy.
«Barlyq jolaýshy qutqaryldy. Buzylyp qalǵan avtobýs «KaMAZ» kóligimen Qyzylorda qalasyna deıin jetkizildi. Jolaýshylar odan ári Shymkentten kelgen ózge avtobýspen mejeli jerine jetetin boldy», - dep málim etti Qyzylorda oblysy Tótenshe jaǵdaılar departamentiniń Órt sóndirý jáne avarııalyq qutqarý jumystary qyzmetinen.
Esterińizge sala ketelik, budan buryn da Nur-Sultannan shyqqan jolaýshylar avtobýsy Qyzylorda trassasynda turyp qalǵan bolatyn.
