Elordadan shaqyrylǵan sarbazdar qandaı áskerı bólimderde boryshyn ótep júr
ASTANA. KAZINFORM — Bıyl kóktemde elordanyń áskerı komıssarıatynyń medıtsınalyq komıssııasy alǵash ret «e-medtekserý» aqparattyq júıesin qoldandy. Bul týraly Astana qalalyq qorǵanys isteri jónindegi departamenti bastyǵynyń orynbasary Ánýar Áýbákirov málim etti.
— Keshe 2026 jylǵy kóktemgi áskerge shaqyrý naýqany aıaqtaldy. Bıyl 21 myńnan astam azamat áskerı qyzmetke attandy. Onyń ishinde Astana qalasynan 1 284 adam shaqyryldy. Olardyń 703-i — Qarýly kúshterge, 405-i — Ulttyq ulanǵa, 119-y — Shekara qyzmetine, 30-y — Tótenshe jaǵdaılar mınıstrligine, 27-si — Memlekettik kúzet qyzmetine jiberildi. Jergilikti áskerı basqarý organdaryn tsıfrlandyrý aıasynda Qorǵanys mınıstrligi 2020 jyldan bastap «Smart-áskerı komıssarıat» atty jańa aqparattyq júıeni engizdi. Bul joba áskerı esepke alý máseleleri boıynsha jeke jáne zańdy tulǵalardyń qatysýyn barynsha azaıtýǵa baǵyttalǵan tsıfrlyq sheshimder keshenin qamtıd», — dedi Ánýar Áýbákirov qalalyq kommýnıkatsııalar qyzmetindegi brıfıngte.
Onyń aıtýynsha, júıeniń negizgi tetigi — azamattardyń derbes áskerı esebin júrgizýge arnalǵan ıntegratsııalyq shlıýz. Joba aıasynda birqatar jańashyldyq iske asyrylyp, búginde tabysty jumys istep tur. Atap aıtqanda, ishki kóshi-qon kezinde azamattardy áskerı esepke avtomatty túrde qoıý, sondaı-aq 17 jasqa tolǵan azamattardy tirkeýge alý barysynda áskerı esepke avtomatty túrde engizý júıesi engizilgen.
Buǵan deıin elimizde áskerge shaqyrý, ant qabyldaý jáne áskerı qyzmetten bosatý jańa formatqa kóshetinin jazǵan edik.
