Elordadan Maqtaaralǵa gýmanıtarlyq júk jóneltildi
NUR-SULTAN. QazAqparat - Búgin elordadan Maqtaaralǵa gýmanıtarlyq júk tıelgen kólik attanyp ketti. Bul júk elordanyń etnomádenı birlestikteri jınaǵan qarajatqa satyp alynǵan, dep habarlaıdy QazAqparat tilshisi.
«Qazirgi ýaqytta Maqtaaralda sýdan zardap shekken turǵyndarǵa búkil respýblıka halqy bolyp, jer-jerden kómek jiberip jatyr. Olardyń qatarynda Nur-Sultan qalasynyń etnomádenı birlestikteri de úles qosý ústinde. Biz 8,5 mln teńgege qarajat jınap, sol qarajatqa azyq-túlik jáne ózge de kerekti zattar satyp aldyq. Mine, búgin sol bir KamAZ bolǵan júkti Maqtaaralǵa jiberdik. 1,5 mln teńge kóleminde aqshalaı da kómegimiz bar», - dedi Qazaqstan halqy Assambleıasy tóraǵasynyń orynbasary Sherzod Pýlatov júkti jóneltý barysynda.
Maqtaaral turǵyndaryna arnalǵan gýmanıtarlyq júkti jónelter aldynda «Áziret Sultan» meshitiniń bas ımamy Erbolat Júsipov quran oqyp, kólik júrgizýshilerine sát-sapar tiledi.
«Qazirgi ýaqytta Maqtaaral turǵyndary úlken qıyndyqqa ushyrap otyr. Osyǵan oraı el basshylyǵy óńir turǵyndaryna qoldaý kórsetýde. Elbasymyz da «Biz birgemiz« degen qaıyrymdylyq jobasyna uıytqy boldy. Elordamyzdyń «Dostyq« úıi osy jobany jalǵastyryp jatyr. Ramazan aıynda mundaı saýap eselene túsedi. Jasaǵan jaqsylyqtyń saýaby 700 esege deıin artady. Osyǵan at salysqan adamdarǵa Alla jar bolsyn! Bul qaıyrymdylyq júgimiz dittegen jerine aman-esen jetip, eldiń ıgiligine jarasa degen shynaıy nıetimiz bar», - dedi Erbolat Júsipov.
