Elordadan qys mezgiliniń basynan beri 66 myńnan astam júk kóligine teń qar shyǵaryldy

ASTANA. KAZINFORM - Qys mezgiliniń basynan bastap kommýnaldyq qyzmetter Astanadan 840 myń tekshe metrden astam qar shyǵardy. Qar tazalaý jumysy táýlik boıy úzdiksiz júrip jatyr, dep habarlaıdy Astana ákimdiginiń resmı saıty.

6 jeltoqsan kúni kúndizgi aýysymda qala kóshelerinen qar men muzdy kúreýge 2,7 myńnan astam jol jumysshy men 100-ge jýyq arnaıy tehnıka jumyldyryldy.

6 jeltoqsanǵa qaraǵan túni qar polıgondaryna 84 aýyr júk reısimen 878 tekshe metr qar shyǵaryldy. 

Qys mezgiliniń basynan beri qaladan 66 519 reıspen 847 myń tekshe metr qar shyǵaryldy. 

Eń aldymen, erejege sáıkes, joldarda keptelis bolmas úshin qozǵalysy óte qarqyndy oryndar tazartylady. Sondaı-aq qarqyndylyǵy ortasha ýchaskeler – alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t.b. tazartylady. 

Ortalyq kóshelerdi, jolaýshylar kóligi marshrýttary júretin oryndardy, aıaldamalar men trotýarlarda tazalaý da basymdyqqa ıe. 

Qalada birneshe jabdyqtalǵan qar polıgony bar. Olar samosval tehnıkasynyń nómirlik belgilerin oqý júıesimen jabdyqtalǵan, munda beınebaqylaý kameralary ornatylyp, jaryqtandyrý qosylǵan.